Búgin Parlament Májilisinde «Jol júrisi týraly» QR Zańyna ózgerister engizý týraly» zań jobasyn talqylaý barysynda depýtat Omarxan Óksikbaev kólikti júrgizgen kezde temeki shegýge tyiym salýdy usyndy. Jumys tobynyń músheleri arasynda bul usynys úlken pikirtalas týǵyzdy. Jiyn barysynda depýtattar temeki shegetinder jáne shekpeitinder bolyp eki topqa bólingendei boldy. Ony jumys tobynyń tóraǵasy da ázildep jetkizdi, dep xabarlaidy "Ult aqparat" Baq.kz portalyna silteme jasap.
«Bárimiz jaqsy bilemiz, adam temeki shekkende onyń zeiin qoiyp, jumys jasaý qabileti tómendeidi. Kólik júrgizýshisi de osyndai jaǵdaiǵa tap bolady. Temeki túsip qalsa, taǵy zeiini buzylady. Al osy máselege úńilip qaraityn bolsaq, temeki mi jumysyna da keri áser etedi. Jalpy, biz kólikpen júrgende uialy telefonmen sóilesýge tyiym saldyq. Al temeki odan da ótken bále, jol qatynasy qaýipsizdigine úlken qaýip tóndiredi. Ókinishke qarai, qazirgi kezde temeki shegý saldarynan bolǵan jol-kólik apattarynyń statistikasy júrgizilmeidi. Degenmen, men ózim ondai birneshe jaǵdaiǵa kýá bolǵanmyn», - deidi O.Óksikbaev.
Depýtattyń aitýynsha, búginde osy ózgeristi adamnyń konstitýtsiialyq quqyǵyn buzý áreketi retinde qarastyryp otyrǵandar bar. O.Óksikbaev ondai pikirmen kelispeidi. Onyń oiynsha, bul bastama qoǵamdyq rezonans týǵyzbaýy tiis. Sebebi kólik júrgizýshileri arasynda temeki shegetinder kóp emes.
«Al kólik júrgizýshisi sondai qatty temeki shekkisi kelse, jolda toqtap, ábden qanǵansha shegip alsyn»,-dep atap kórsetti xalyq qalaýlysy.
O.Óksikbaevtyń sózinen keiin jumys toby shýlap ketti. Bul bastamany estip, ezý tartqan azamattar da boldy. Jumys tobynyń talqylaýyna qatysqan depýtattar, quqyq qorǵaýshylar, saiasi partiialardyń ókilderi men zańgerler ekige bólindi. Bir jaq osy bastamaǵa qarsy shyqsa, ekinshiler tolyǵymen qoldady.
QR Ádilet vitse-ministri Záýresh Baimoldinanyń aitýynsha, búginde qoǵamdyq kólikte temeki shegýge tyiym salynǵan. Alaida jeke kólik júrgizýshilerine ondai shekteý taramaidy. Baimoldina xanym ózi temeki shekpese de, O.Óksikbaevtyń bastamasymen kelispei otyr.
Al, Bas prokýrordyń orynbasary Andrei Kravchenko jeke kólik júrgizýshileri úshin temeki shegýge tyiym salý qajet dep sanaidy.
«Men ózim kúnde kólikke otyrǵanda ushqyshtardyń erejesi (temeki shegýge bolmaityny týraly - avt.) esime túsedi. Bul - meniń qaýipsizdigim, meniń janymdaǵy adamdardyń qaýipsizdigi. Sondyqtan bul bastama asa ózekti másele bolyp sanalady»,-dedi A.Kravchenko.
