Parlament Májilisine jańa Sý kodeksiniń jobasyn jaqyn arada engizý kerek. Bul týraly Parlament Májilisiniń tóraǵasy Erlan Qoshanov málim etti, dep habarlaidy QazAqparat.
«Elimizdiń sý salasyn damytý úshin birneshe usynysym bar. Birinshiden, jaqyn arada Parlament Májilisine jańa Sý kodeksin engizý kerek. Mendegi aqparat boiynsha bul Sý kodeksi ministrlikte ázirlenip jatyr. Bul qujatty bizdiń qaraýmyzǵa tez arada engizý mańyzdy. Eń bastysy, kodeks sý resýrstaryn saqtaýǵa jáne olardy tiimdi paidalanýǵa baǵyttalýǵa tiis», - dedi Qoshanov Májilistegi parlamenttik tyńdaý barysynda.
Onyń paiymynsha, eldi mekenderde sýmen jabdyqtaý, sý burý júielerin paidalaný, jobalaý, salý jáne rekonstrýktsiialaý jónindegi Biryńǵai operator qurý kerek.
«Parlament, Úkimet, azamattyq qoǵam, ǵalymdar men sarapshylar qoǵamdastyǵy, kásipkerler birlesip, syndarly jumys istegen kezde ǵana biz Memleket basshysynyń tapsyrmalaryn tiimdi oryndai alamyz. Búgin Qazaqstannyń sý salasyn jetildirý úshin naqty usynystar ázirleýge múmkindik beretin mazmundy pikirtalas bolady dep oilaimyn.
Sizderdiń barlyq usynystaryńyz muqiiat taldanyp, zerdelenedi. Búgingi parlamenttik tyńdaýdyń qorytyndysy depýtattar men Úkimet bastamashy bolatyn birqatar taqyryptyq zań jobalar aiasynda talqylanbaq», - dedi Májilis tóraǵasy.
Budan buryn habarlanǵandai, jańa Sý kodeksiniń jobasy 2023 jyly Parlamentke engiziledi.
