Parlament «Qazaqstan Respýblikasynyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» Zańyn qabyldady, dep habarlaidy "Ult aqparat".
Búgin Parlament Májilisiniń jalpy otyrysynda palata depýtattary Senat engizgen tolyqtyrýlarmen kelisti.
Aita keteiik, 21 jeltoqsan kúni Senattyń jalpy otyrysynda atalǵan qujat eki oqylymda qaraldy. Qujatqa tolyqtyrýlar engizilgendikten, zań jobasy Májiliske qaitaryldy.
Zań jobasymen jumys barysynda QR Parlamenti Senaty komitetteriniń birqatar ózgerister men tolyqtyrýlar engizý qajettigi týyndady. Qujatty qaraý kezindegi talqylaý barysynda naqtylaýshy sipattaǵy ózgerister men tolyqtyrýlar engizý kerek bolǵany atap ótildi. Osy oraida ishki qarama-qaishylyqty boldyrmaý jáne zań jobasynyń normalaryn qoldanysqa engizý eskerilgen.
«Senat engizgen túzetýler naqtylaý sipatyna ie jáne Májilis maquldaǵan zań jobasynyń tujyrymdamasy men mazmunyn ózgertpeidi. Sondyqtan Májilistiń Ekonomikalyq reforma jáne óńirlik damý komiteti Qazaqstan Respýblikasynyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» zań jobasyna Senat engizgen tolyqtyrýlarǵa kelisim bildirýdi usynady», - dedi Májilis depýtaty Sáken Ótebaev.
Qujat aiasynda Memleket basshysynyń tapsyrmasymen azamattardyń óz zeinetaqy jinaǵynyń bir bóligin baspana alýǵa jáne emdelýge jumsaýy úshin qoldaný quqyǵy belgilenedi. Zań jobasy mikroqarjy uiymdary men basshylarǵa qoiylatyn talaptardy arttyrýdy da kózdeidi. Bul qaryz alýshylardyń múddelerin qorǵaýǵa jáne qarjy naryǵynda turaqtylyqty qamtamasyz etýge múmkindik beredi.
