Parlament palatalarynyń birlesken otyrysynda Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepteri qabyldandy, dep habarlaidy QazAqparat.
Birlesken otyrysta tiisti qaýly jobasy daýys berýge shyǵaryldy.
«Úkimettiń jáne Esep komitetiniń 2020 jylǵa arnalǵan respýblikalyq biýdjettiń atqarylýy týraly esepteri qabyldandy», - dedi Májilis tóraǵasy Nurlan Nyǵmatýlin.
Premer-Ministr Asqar Mamin óz sózinde 2020 jyl sońǵy 100 jyldaǵy eń daǵdarystyq kezeń bolǵanyn atap ótti.
«2020 jyl - halyqaralyq sarapshylardyń baǵalaýy boiynsha sońǵy 100 jyldaǵy eń daǵdarystyq kezeń boldy. Koronavirýs pandemiiasy álemdik ekonomikanyń damý jaǵdaiyn jáne onyń qurylymyn túbegeili ózgertti. Sonymen qatar, jańa áleýmettik-ekonomikalyq úrdister qalyptasty», - dedi ol.
Premer-Ministrdiń atap ótýinshe, Úkimet QR Parlamentimen belsendi ózara is-qimyl jasai otyryp, osyndai kúrdeli kezeńde, azamattar men biznesti qoldaýǵa baǵyttalǵan asa mańyzdy sheshimderdi der kezinde qabyldady. Buǵan QR Parlamenti orasan zor úles qosty.
«Osy sátti paidalanyp, Parlamenttiń qos palatasynyń barlyq depýtattaryna syndarly jáne nátijeli jumys úshin alǵys aitqym keledi. Aýqymdy jáne ýaqtyly qoldaý sharalaryn, sondai-aq kontrtsikldi makroekonomikalyq saiasatty iske asyrý 2020 jyly Qazaqstan ekonomikasynyń tómendeýin 2,6 paiyzǵa deiin, al negizgi kapitalǵa investitsiianyń azaiýyn 3,4 paiyzǵa shekteýge múmkindik berdi», - dedi Asqar Mamin.
Óz kezeginde Qarjy ministri Erulan Jamaýbaev Úkimet esebi Parlamenttiń Májilisi men Senatynda egjei-tegjeili qaralǵanyn, esepti talqylaý kezinde ekonomikanyń barlyq salalary boiynsha 500-den astam suraqtar men usynystar berilgenin atap ótti.
Respýblikalyq biýdjettiń negizgi parametrleri tolyq atqaryldy. Biýdjet túsimderi 12 trln 49 mlrd teńgeni nemese josparǵa 100,3 paiyzdy qurady. Iaǵni jospar oryndaldy. Shyǵystar 98,3 paiyzǵa igerildi jáne 14 trln 234 mlrd teńge boldy», - dedi E. Jamaýbaev Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde. Biýdjet tapshylyǵy 2 trln 185 mlrd teńgeni nemese jalpy ishki ónimniń 3,1 paiyzyn qurady.
Budan bólek, Respýblikalyq biýdjettiń atqarylýyn baqylaý jónindegi esep komitetiniń tóraiymy Natalia Godýnova Ulttyq qor qarajatyn basqarýdyń tásilderin qaita qaraý kerek ekenin alǵa tartty.
«2020 jylǵy respýblikalyq biýdjettiń atqarylýy COVID-19 pandemiiasynan týyndaǵan qatań shekteý is-sharalarymen jáne munai baǵasynyń rekordtyq tómendeýinen sipattalatyn daǵdarys jaǵdailarynda júzege asyryldy. Alaida, Memleket basshysynyń tapsyrmalary boiynsha qabyldanǵan is-sharalardyń arqasynda Úkimet Qazaqstan ekonomikasynyń eleýli quldyraýynyń aldyn alýǵa jáne syrtqy kúizelisterdiń saldaryn azaitýǵa qol jetkizdi. Ulttyq qor el úshin «qaýipsizdik jastyǵy» rólin taǵy da oryndady», - dedi komitet tóraiymy.
Degenmen, onyń atap ótýinshe, álemdik ekonomika túbegeili ózgerip jatqan kezeńde shikizattyq emes kiristerdiń jańa kózderin izdeý jáne Ulttyq qor qarajatyn basqarýdyń tásilderin qaita qaraý qajet.
«Munai-gaz sektoryna degen táýeldilik tólem balansynyń jai-kúiiniń nasharlaýyn jáne ulttyq valiýtanyń turaqtylyǵy táýekelin týdyrady. Kásipkerlikti, ásirese, ónerkásipti qoldaýǵa aitarlyqtai kúsh-jiger jumsalýy tiis», - dedi Natalia Godýnova.
