Búgin Parlament Senatynyń jalpy otyrysynda «Pedagog mártebesi týraly» Zań qabyldandy, dep habarlaidy "Ult aqparat".
«Pedagog mártebesi týraly» zań jobasy 21 baptan turady jáne jarty millionnan astam ustazdyń jumysyna qatysty. Jalpy, zań jobasy tórt baǵytty qamtidy. Birinshiden, ustazdardyń quqyqtaryn keńeitý jáne ózine tán emes jumystardan bosatý, olardyń júktemesin azaitý. Ekinshiden, muǵalimniń qyzmetine qoiylatyn talaptardy kúsheitý. Úshinshiden, materialdyq emes yntalandyrý tetikteri, sondai-aq tórtinshiden, materialdy yntalandyrý qadamdary», - dedi QR Bilim jáne ǵylym ministri Ashat Aimaǵambetov.
Onyń sózine qaraǵanda, birinshi baǵyt - pedagogtardyń quqyqtary boiynsha birneshe norma qarastyrylǵan. Olardyń barlyǵy muǵalimniń jeke damýyna jáne oqý protsesin jetildirýge múmkindik beredi. Muǵalimderdi artyq jumysqa, óziniń qyzmetine kirmeitin jumysqa tartýǵa, shamadan tys esep berýge, qaǵazbastylyqqa, negizsiz tekserý júrgizýge tyiym salý arqyly júktemeni azaitý boiynsha jeke normalar kózdelgen.
«Pedagog mártebesin arttyrý onyń qyzmetine qoiylatyn talaptardy kúsheitýdi qajet etedi. Osy oraida zań jobasyna sáikes, pedagogikalyq jumysqa jiberilmeitin sebepter de keńeitildi. Budan bólek, muǵalimderdiń etika máselelerine de kóńil aýdarylyp otyr. Ár bilim mekemesinde ádep boiynsha keńester institýty engizilip, jumys isteidi», - dedi ministr.
A. Aimaǵambetovtyń aitýynsha, muǵalimderdiń balalaryna balabaqshaǵa birinshi kezekte oryn berý normasy qarastyryp otyr. Barlyq pedagog qyzmetkerler aldaǵy ýaqytta 56 kúndik demalysqa shyǵa bastaidy.
Sonymen qatar aýyldyq jerlerde jumys isteitin pedagogtarǵa jeke turǵyn úi qurylysy úshin jer ýchaskelerin alý úshin basymdyq berilmek. Bilim berý uiymdarynda jumys isteitin er azamattardy áskeri qyzmetke shaqyrýdy keiinge qaldyrý normasy da qarastyrylǵan. Bunyń aldynda osy norma aýyldyq jerge qatysty bolsa, qazirgi ýaqytta bul norma keńeitilip otyr.
«Memleket basshysynyń Tamyz konferentsiiasynda bergen tapsyrmasynyń aiasynda tórt jyl ishinde muǵalimderdiń eńbekaqysy eki ese artady. Bul turǵydan aldaǵy qańtar aiynan bastap pedagogtardyń jalaqysy 25 paiyzǵa ósedi. Depýtattardyń qoldaýymen osy bekitilgen biýdjette tiisti qarajat qarastyrylǵan. Biz osy jumysqa qańtardan bastap kirisýge daiynbyz», - dedi Ashat Aimaǵambetov.
Belgili bolǵandai, oqý oryndarynyń muǵalimderine magistr dárejesi úshin qosymsha aqy engiziledi.
Aita keteiik, Senattyń jalpy otyrysynda «Qazaqstan Respýblikasynyń keibir zańnamalyq aktilerine pedagog mártebesi, oqýshy men muǵalimge júktemeni tómendetý máseleleri boiynsha ózgerister men tolyqtyrýlar engizý týraly» Zańy da eki oqylymda qaralyp, qabyldandy.
