Búgin Parlament palatalarynyń birlesken otyrysy ótip, altynshy sailanǵan Parlament úshinshi sessiiasyn aiaqtady, dep habarlaidy "Ult aqparat".
«Búgin biz altynshy sailanǵan QR Parlamentiniń úshinshi sessiiasyn aiaqtap otyrmyz. Bul bizdiń jumysymyzǵa qorytyndy jasap qana qoimai, eń birinshiden aldaǵy maqsattardy josparlaityn óte mańyzdy sát. Árine, depýtattyq korpýstyń búkil jumysy Elbasy Nursultan Nazarbaevtyń úshinshi sessiianyń ashylýynda kórsetken strategiialyq tapsyrmalaryn, sonymen birge Prezidenttiń biylǵy Joldaýynda kórsetilgen barlyq mindetterdi júzege asyrýǵa arnaldy», - dep toqtaldy QR Parlamenti Májilisiniń tóraǵasy Nurlan Nyǵmatýlin.
Birlesken otyrys barysynda ol dástúr boiynsha atqarylǵan jumystarǵa esep berdi. Osy oraida N. Nyǵmatýlin altynshy sailanǵan Parlamenttiń úshinshi sessiiasy óte mańyzdy ári tarihi kezeńde ótkenin atap ótti. Sessiia kezinde depýtattar úkimettik zań jobalarymen qatar, ózderiniń zań shyǵarý bastamasyn da oidaǵydai júzege asyrdy.
«Qabyldanǵan barlyq zańdar, árbir is-sharalar elimizdiń turaqty damýyna, qazaqstandyqtardyń jaǵdaiyn jaqsartýǵa, el birligin arttyrýǵa zor yqpal etetini sózsiz. Bul Senat pen Májilistiń jáne Úkimetpen, barlyq memlekettik organdarmen, qoǵamdyq uiymdarmen birlesip atqarǵan eleýli eńbekteriniń jemisi dep bilemiz. Ótken sessiiada Parlamentte 18 Úkimet saǵaty, alty parlamenttik tyńdaý, 27 «dóńgelek ústel» otyrysy, komitetterdiń 44 kóshpeli otyrysy, sondai-aq úsh halyqaralyq konferentsiia uiymdastyryldy. Olar óte mańyzdy elimizdiń ekonomikalyq jáne áleýmettik máselelerine arnaldy. Eń aldymen, árine, memleketimiz úshin, halqymyz úshin tarihi mańyzy zor jańa álipbi máselesi talqylandy. Osy máselege arnalǵan parlamenttik tyńdaý memleketimizdiń rýhani jańǵyrý jolyndaǵy naqty ári qajetti qadam bolyp tabylady», - dedi Májilis tóraǵasy.
Eki palata depýtattary tikelei halqymyz kóterip otyrǵan mańyzdy máselelerge kóńil bólip, sessiia barysynda tiisti organdarǵa 374 depýtattyq saýal joldady. Onyń ishinde Májilis depýtattarynan 274 caýal, Senat depýtattarynan 100 saýal boldy.
«Sessiia kezinde azamattardan 9 myńnan astam hat kelip, olar talapqa sai qaralyp, tiisti sheshimder qabyldandy. Bul oraida Parlamenttiń aimaqtarǵa sapary týraly da erekshe atap ótý kerek. Sebebi ótken kezdesýlerde depýtattar oblys ortalyqtarynda, aýdan men qalalarda bolyp, Prezidenttiń Joldaýy men bes áleýmettik bastamasyn árbir otbasyna, árbir azamatqa jetkizdi. Onyń nátijesinde, Senat pen Májilistiń barlyq depýtattary 4 myńnan astam kezdesý ótkizdi», - dedi Nurlan Nyǵmatýlin.
Aita keteiik, qos palatanyń 4 birlesken otyrysy, Májilistiń - 38, Senattyń 25 jalpy otyrystary ótti. Onda 400-ge jýyq mańyzdy máseleler qaraldy. Úshinshi sessiia bastalǵan kezde 2 palatanyń qaraýynda 129 zań jobasy bolsa, búginde olardyń 84-i qabyldandy. Qazirgi ýaqytta 65 zańǵa Memleket basshysy qol qoiyp, olar kúshine endi.
