Májilis pen máslihat sailaýy kezinde saiasi partiialardyń ótý shegi 7 paiyzdan 5 paiyzǵa deiin tómendeidi. Osy oraida senator Lázzát Súleimen bul normaǵa qatysty pikir bildirdi, dep habarlaidy "Ult aqparat".
Aita keteiik, búgin Senattyń jalpy otyrysynda «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» Zańy qabyldandy.
«Májilis pen máslihat depýtattary sailaýda saiasi partiialardyń ótý shegin 7 paiyzdan 5 paiyzǵa deiin tómendetý saiasi básekelestikti odan ári damytýǵa baǵyttalyp otyr. Álemdik tájiribede bul kórsetkish 1%-dan 10%-ǵa deiin. Kóptegen elderde proportsionaldy júie boiynsha sailaý shegi 5% deńgeiinde qalyptasty», - dedi L. Súleimen.
Onyń aitýynsha, «barlyǵyna qarsy» degen baǵan Resei Federatsiiasynyń, Avstraliianyń, Ispaniianyń, Úndistannyń jáne birqatar eýropa elderiniń biýlletenderinde bar.
«Osy baǵandy engizý arqyly biz tańdaý erkindigin qamtamasyz etemiz. Bul da mańyzdy norma», - dedi senator.
Engizilip otyrǵan jańashyldyqtar:
– azamattarǵa ózderiniń konstitýtsiialyq quqyqtaryn tolyqqandy iske asyrýda belsendilikti arttyrýǵa;
– jergilikti memlekettik basqarý organdarynyń halyqtyń qajettilikterin jáne problemalaryn naqty sheshýge, iaǵni «Halyq únine qulaq asatyn» memleket tujyrymdamasyn tolyq kólemde iske asyrýǵa múmkindik beredi.
