Parlament Senatynyń jalpy otyrysynda palata depýtattary «Eýraziialyq ekonomikalyq odaq sheńberinde baǵaly metaldarmen jáne asyl tastarmen operatsiialardy júzege asyrý erekshelikteri týraly kelisimdi ratifikatsiialaý týraly» Zańdy qabyldady, dep habarlaidy QazAqparat.
Kelisimge Eýraziialyq ekonomikalyq odaqqa qatysýshy elder arasynda 2019 jylǵy 22 qarashada Máskeý qalasynda qol qoiyldy.
Kelisimniń maqsaty – atalǵan salada múshe memleketterdiń básekelestik artyqshylyǵyn jasaý jáne tiimdi sharalar ázirleýge baǵyttalǵan saýda-ekonomikalyq tetikter qalyptastyrý. Sondai-aq, EAEO kedendik aýmaǵynda baǵaly metaldar men asyl tastardyń erkin ainalymyn qamtamasyz etý úshin jaǵdai jasaý.
«Kelisim baǵaly metaldar, asyl tastar jáne olardan jasalǵan buiymdardyń ishki naryǵyna qatysty quqyqtyq negizder men talaptardy aiqyndaityn 18 baptan turady. Qujat EAEO-nyń zergerlik buiymdarynyń ishki naryǵyndaǵy saýdada múshe memleketterdiń synamalyq tańbalaryn ózara tanýdyń bolmaýyna bailanysty týyndaityn shekteýlerdi joiady. Iaǵni, eger zergerlik buiym Qazaqstanda jasalsa jáne synalsa, ol buiymdy EAEO-ǵa qatysýshy elderde ótkizý barysynda qaita synamalaý qajeti bolmaidy», - dedi Indýstriia jáne infraqurylymdyq damý vitse-ministri Amaniiaz Erjanov.
Onyń aitýynsha, synamalyq tańbalardy ózara taný bastapqy sholý saparlarynan keiin (quramyna EAEO-nyń barlyq elderiniń ókilderi kiredi) qamtamasyz etiledi. Múshe memleketterdiń Kelisim erejelerin qanshalyqty oryndap jatqanyn anyqtaý úshin ondai saparlar bes jylda bir ret ótkizilip turady. Sondai-aq, kelisim óńdelmegen tabiǵi almastardy EAEO-ǵa múshe bir memleket aýmaǵynan ekinshisine tasymaldaýdy qarastyrady. Ol óńdelmegen tabiǵi almastardy sertifikattaýdyń halyqaralyq kestesi – Kimberlii protsesi talaptaryna sáikes iske asyrylady. Kimberli protsesine qatysýshy árbir el almastyń birde-bir partiiasy oǵan qatyspaityn tarapqa importtalmaitynyna nemese eksporttalmaitynyna kepildik beredi. Eýraziialyq ekonomikalyq odaqqa qatysýshy barlyq el - Kimberlii protsesiniń múshesi.
«Tiisti normalar tolyq esep júrgizýge jáne sybailas jemqorlyqqa qarsy is-qimyl jasaýǵa múmkindik beredi. Sondai-aq kelisim elde óndiriletin altyndy satyp alýda qatysýshy memleketterdiń basym quqyǵyn moiyndaidy. Jalpy alǵanda, kelisimge qol qoiý jáne ony qoldaný Eýraziialyq ekonomikalyq odaq elderimen birlesip, baǵaly metaldar jáne asyl tastar naryǵynda ózara senim qalyptastyrýǵa múmkindik beredi», - dedi A. Erjanov.
