Qazaqstandyq ánshi Dimash Qudaibergen Parijde IýNESKO shtab-páterinde "Rýhani jańǵyrý" ulttyq baǵdarlamasynyń tanystyrylymyna orai uiymdastyrylǵan gala-kontsertte óner kórsetti, - dep habarlaidy Tengrinews.kz tilshisi Frantsiiadan.
Tanymal oryndaýshyǵa jurtshylyq ornynan turyp, qoshemet kórsetti. Ol tyńdarmandaryna eki án oryndap berdi - biri qazaq, ekinshisi frantsýz tilinde.
Frantsiia astanasynda ótken gala-kontsertke 30 adamnan turatyn top keldi - barlyǵy Dimash Qudaibergenniń tyńdarmany. Jas ártistiń án oryndaýynan keiin jankúierleri ony kóp ýaqyt boiy jibermei turyp aldy. Olar Dimashty jaqsy kóretinin aityp, birge túsken sýretteri úshin alǵys bildirip, gúl shoqtaryn syilap, ánshiniń qoltańbasyn alyp jatty.
35 jastaǵy Anna Panti súiikti ánshisin kórý úshin Parijge arnaiy Angliiadan kelipti. Dimash Qudaibergen onyń qolyna qoltańba qoiyp berdi.
"Men onyń daýsyn Internetten kezdeisoq estip qaldym, sosyn ony I am Singer mýzykalyq baiqaýynan baqylai bastadym. Al keiin Dimash Qudaibergenniń fan-klýbyna qosyldym. Men ony tuńǵysh ret óz kózimmen kórip turmyn, buryn videodan ǵana kórgenmin. Búgin erekshe áser aldym", - dedi Anna Pani.
Parijge Dimash Qudaibergenniń Qytaidaǵy jankúierleri de kelipti. Ánshiniń óz tyńdarmandarymen kezdesýi jarty saǵatqa sozyldy. Tyńdarmandar ony jibergisi kelmedi. Dimash sharaǵa kelgen árbir tyńdarmanymen sýretke túsip, syilyqtaryn alyp, tilekterin estidi. Al qaitarynda syilanǵan gúlin umytyp ketipti.
Aita keteiik, IýNESKO shtab-páterindegi gala-kontsertke basqa da qazaqstandyq ónerpazdar qatysty: Maira Muhamedqyzy, Saltanat Ahmetova, Medet Shotabaev, Arman Júdebaev jáne Nomad etno-folklorlyq ansambli
