Foto: Almaty ákimdiginiń baspasóz qyzmeti
Qazaq sport jáne týrizm akademiiasynda jańa oqý jyly erekshe atap ótildi. Bilim kúnin merekeleý sharasynda Parij Olimpiadasynda júlde alǵan sportshylar stýdenttermen kezdesti. Bul týraly akademiianyń Instagram jelisindegi resmi paraqshasynda habarlandy.
Akademiianyń túlekteri Parij Olimpiadasynda el qorjynyna túsken jeti medaldiń beseýin ielenip, elimizdiń abyroiyn asqaqtatqan bolatyn. Osyǵan orai, Demeý Jadraev, Nariman Qurbanov, Ǵusman Qyrǵyzbaev, Nazym Qyzaibai, jáne Islam Sátbaev siiaqty sportshylardyń esimderi akademiianyń Olimpiada júldegerleri stendinde altyn árippen jazylatyn boldy.
Sharaǵa qatysqan el maqtanyshtary birinshi kýrs stýdentteri men izbasarlaryna motivatsiia berip, aqyl-keńesterin aitty. Sondai-aq, Qazaq sport jáne týrizm akademiiasynyń prezidenti Qairat Zakirianov Parij Olimpiadasynyń júldegerlerine akademiianyń granttaryn tabystap, olarǵa magistratýra men doktorantýrada tegin bilim alýǵa múmkindik berdi.
Akademiiaǵa biyl myńnan astam stýdent qabyldanyp, olardyń arasynda álem chempiondary men túrli sport túrlerinen jeńimpazdar da bar. Merekelik shara joǵary deńgeide ótip, án-kúimen jalǵasty. Stýdentterge jańa serpin bergen jiynda Olimpiada júldegerleri qatysýshylarmen estelik sýretke tústi.
