Halyqaralyq áielder kúni merekesi qarsańynda Eýrokomissiia 2021 jyly Eýroodaqtaǵy genderlik teńdik týraly baiandama jariialady, onda COVID-19 pandemiiasynyń áielderge jaǵymsyz áser etkeni týraly aitylǵan, dep habarlaidy QazAqparat.
Baiandamada aitylǵandai, pandemiia er men áiel arasyndaǵy burynnan bar teńsizdik máselesin barlyq salada ýshyqtyryp jebirdi. Mundai jaǵdai Eýropamen qatar, onyń syrtyndaǵy elderde de baiqalǵan.
Múshe-memleketter turmystyq zorlyq-zombylyqtyń artqanyn tirkegen. Máselen, Frantsiiada turmystyq zorlyq-zombylyq lokdaýnnyń alǵashqy aptasynda 32%-ǵa, Litvada alǵashqy úsh aptada 20%-ǵa kóbeigen. Irlandiiada turmystyq zorlyq-zombylyq bes esege artqan, ispan biligi karantinniń alǵashqy eki aptasynda zorlyq-zombylyq týraly habarlaǵandardyń 18%-ǵa kóbeigenin málimdedi.
Pandemiiamen kúreste áielder aldyńǵy shepte qyzmet etken bolyp shyqty: meditsina jáne áleýmettik qyzmetkerlerdiń 76%-y – áielder, Eýroodaq elderiniń sanitariia qyzmetiniń 86% jumysshysy da názik jandylar.
Pandemiiaǵa bailanysty bul saladaǵy áielder jumystyń aýyrtpalyǵyn kóterip, densaýlyǵyna qaýip tóndirip, jumys pen jeke ómir arasyndaǵy máselelerge tap boldy.
Sonymen qatar, genderlik teńdik eshqashan EO-nyń saiasi kún tártibinde mundai joǵary orynǵa ie bolǵan emes. Komissiia bir jyl buryn qabyldanǵan genderlik teńdik strategiiasyn iske asyrý úshin aitarlyqtai kúsh jumsady.
27 múshe-memlekettiń árqaisysyndaǵy ilgerileýdi baqylap otyrý úshin Eýrokomissiia Genderlik teńdik strategiiasyna monitoring jasaý portalyn iske qosty.
Eýrokomissiianyń qundylyqtar jáne ashyqtyq jónindegi vitse-prezidenti Vera Iýrova «Áielder pandemiiamen kúreste aldyńǵy shepte keledi, biz ádildik pen teńdikti talap etýimiz kerek» dep atap ótti.
EO-nyń teńdik máseleleri boiynsha komissary Helena Dalli «COVID-19 daǵdarysy áielderdiń ómirine jaǵymsyz áser etkenimen, bul jaǵdaidy múmkindik retinde paidalanýymyz kerek» dedi.
