Halyqaralyq simpoziýmde pandemiiadan keiingi turaqty qalpyna keltirý isinde memlekettik institýttar múmkindikteri talqylandy, dep habarlaidy "Ult aqparat".
Álemniń 70 elinen qatysýshylar Covid-19 pandemiiasynan keiin tiimdi institýttardy ilgeriletip, tynys tirshilikti qaita qalpyna keltirý boiynsha synaqtar men alynǵan sabaqtar tóńireginde oi-pikirlerimen bólisti. Onlain formatta ótken simpoziým Turaqty Damý Maqsattaryn (TDM) iske asyrý jáne turaqty qaita qalpyna keltirý isinde tiimdi, inkliýzivti jáne esep beretin memlekettik mekemeler men tsifrlyq úkimetti transformatsiialaý máselelerine arnaldy.
Is-sharanyń ashylý saltanatynda BUU Bas hatshysynyń Ekonomikalyq jáne áleýmettik máseleler jónindegi orynbasary Liý Chjenmin, Koreia Respýblikasy Ishki ister jáne qaýipsizdik ministri Chin En, Koreia Respýblikasynyń Inchhon qalasynyń meri Namchýn Pak jyly lebizderin bildirdi. Al arnaiy baiandamashylar retinde BUU-nyń 8-shi Bas hatshysy Pan Gi Mýn men Bangladesh Halyq Respýblikasynyń Memlekettik jáne qoǵamdyq basqarý ministri Farhad Hossein shaqyryldy.
Astana memlekettik qyzmet habynyń basqarýshy komiteti tóraǵasy Alihan Baimenov simpoziýmda jasaǵan baiandamasynda: «Qazirgi kezde mekemelerdiń turaqtylyǵyn nyǵaitý - jumystyń sheshýshi baǵytyna ainalǵanyn» aita otyryp, «VUCA álemindegi synaqtarǵa jaýap berý úshin úkimetterge qajetti sipattamalardan ózge, pandemiia jańa ahýaldy qalyptastyryp, memlekettik organdardyń sheshýshi rólin taǵy bir márte aiǵaqtady», - dedi. Ol, sondai-aq, pandemiia jaǵdaiynda psihologiialyq aspektiniń mańyzdylyǵyn da atap ótti. «Qazir eń aldymen jumys ortasyna nazar salýdyń mańyzdylyǵy arta tústi. Sondyqtan, tehnologiialarmen qatar, memlekettik basqarý júiesindegi kóshbasshylyq pen kadr saiasatyna kóńil bólgen jón», - dedi Baimenov.
Spikerler pandemiianyń áleýmettik-ekonomikalyq saldaryn tejeý jáne soǵan qatysty úilesimdi sharalar qabyldaýda esep beretin jáne inkliýzivti institýttar mańyzdylyǵyna toqtaldy. Olar, sonymen birge, daǵdarys kezeńinde biznestiń úzdiksiz jumysyn qamtamasyz etip, qajetti memlekettik qyzmetterdi usyný úshin innovatsiialar men tsifrlyq sheshimderdiń airyqsha rólin atap ótti. Baiandamashylardyń aitýynsha, kóshbasshylyq, aimaqtyq yntymaqtastyq jáne tsifrlyq ekonomika - turaqtylyqty nyǵaitýda jáne pandemiia saldarynan týyndaǵan irkilisterdi joiýda negizgi elementter.
Simpoziým memelketti korgandar men halyqaralyq uiymdar tarapynan qyzyǵýshylyq týdyryp, álemniń 70 elinen 450-den astam ǵalym, praktik, sarapshylar basyn qosty.
Simpoziým BUU-nyń Ekonomikalyq jáne áleýmettik máseleler jónindegi departamentiniń (UN DESA) Memlekettik mekemeler jáne tsifrlyq úkimet bólimi (DPIDG) onyń Basqarý máseleleri jónindegi jobalyq biýro (UNPOG) arqyly Koreia Respýblikasy Úkimetiniń ishki ister jáne qaýipsizdik ministrligimen (MOIS) birlese uiymdastyryldy.
