Pandemiia saldarynan bolǵan oqý sapasynyń kemshilikterin joiý úshin arnaiy baǵdarlama júzege asyrylady. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Orta bilim berýde 12 jyldyq oqytýǵa kezeń-kezeńmen kóshý kózdelgen. Memleket basshysynyń tapsyrmasy boiynsha matematika, tilder jáne informatika pánderin oqytýǵa erekshe basymdyq beremiz. Oqýlyqtardyń sapasyn jaqsartý úshin alǵash ret úlgilik oqý baǵdarlamalaryn saraptaýdan jáne aprobatsiiadan ótkizip, oqýlyqtardy daiyndaý, saraptaý men basyp shyǵarýdyń jańa úlgisi engiziledi», - dedi ol.
Osy rette ministr Zańǵa 2021 jyldyń basynda ózgerister engizilgenin eske salyp ótti.
«Oqýlyqtardyń qurylymy men mazmunyna qoiylatyn biryńǵai talaptardy bekitemiz. Sarapshylarǵa kýrstar uiymdastyrylady, arnaiy bazasy qalyptastyrylady. Úlgerim deńgeii tómen oqýshylarǵa basymdyq bere otyryp, bilimdi qalpyna keltirý sharalary jasalady. Jalpy, pandemiianyń saldarynan bolǵan oqý sapasynyń kemshilikterin joiý úshin arnaiy baǵdarlamany júzege asyramyz», - dedi Ashat Aimaǵambetov.
