Pandemiia áli aiaqtalǵan joq. Bul týraly Qazaqstanǵa is sapary barysynda Dúniejúzilik densaýlyq saqtaý uiymynyń Eýropalyq aimaqtyq biýrosynyń basshysy Hans Kliýge málim etti, dep habarlaidy QazAqparat.
Hans Kliýge koronavirýs pandemiiasy áli de jalǵasyp jatqanyn aityp, halyqty karantin talaptaryn saqtaýǵa shaqyrdy.
«Pandemiia áli aiaqtalǵan joq. Eýropa aimaǵyndaǵy 53 eldiń 18-de infektsiia órship tur. Desekte, jaqsy úderis bar, qoǵamda ujymdyq immýnitet qalyptasa bastady, vaktsinatsiia deńgeii joǵary elderde ekonomika birtindep qalpyna kelip, ólim-jitim azaidy», - dedi spiker Almatydaǵy jumys sapary barysynda.
Onyń aitýynsha, vaktsinatsiia deńgeii óte tómen elderde infektsiia qaita órship barady.
«Men bolashaqqa senimmen qaraimyn. Koronavirýs bizdi birneshe ret tań qaldyrdy. Erteńgi kúni onyń jańa nusqasy paida bolýy da múmkin. Alaida, halyq ony eshqandai lokdaýnsyz jeńe alady. Tek tórt shartty oryndasa bolǵany:
Birinshiden, halyqtyń áleýmettik jaǵynan álsiz tobyn qorǵaý kerek. Óitkeni, COVID-19-dan qaitys bolǵan adamdardyń basym bóligi ekpe almaǵan egde jastaǵy nemese sozylmaly aýrýǵa shaldyqqan adamdar. Iaǵni, vaktsinatsiia almaǵandar koronavirýsqa qarsy ekpeni alý qajet. Al ekpe alǵandar onyń úshinshi, kúsheitkish dozasyn alýy tiis.
Ekinshiden, árbir el virýstyń jańa nusqasy paida bolǵan kezde basqa memleketterge habarlaý úshin monitoringti kúsheitýi kerek. Ony meditsinalyq-sanitarlyq alǵashqy kómek uiymdary arqyly jasaýǵa bolady.
Úshinshiden, koronavirýsqa qarsy preparattardyń qoljetimdi bolýy óte mańyzdy. Virýsty jeńýdiń jaqsy joly - vaktsinatsiia jáne emdeý.
Tórtinshiden, memleketter qabyldanǵan sharalardy birte-birte jeńildetýi kerek. Alaida adamdar kóp jinalatyn jerlerde áli de maska taǵýdy usynamyn», - dedi ol.
