Tájikstannyń soltústigindegi Kanibadam qalasynda 42 jastaǵy erli-zaiyptylardyń óz-ózine qol jumsaý faktisi boiynsha tergeý júrip jatyr.
Erli-zaiyptylar qyzynyń toiyna bir ai qalǵanda sýitsid jasaǵan. Oǵan 19 jastaǵy boijetkenniń pák bolmai shyǵýy sebep bolǵan. Qyzdyń ózi de sýǵa sekirip ketpek bolady, biraq ony sol jerde júrgen adamdar qutqaryp qalǵan.
Akhbor.com saitynyń habarlaýynsha, Pýlodon selolyq keńesiniń turǵyny Mýrodjon Ganiev shildeniń 13-inen 14-ine qaraǵan túni óz úiinde asylyp qalǵan. 14 shilde tańeteń áieli Shoirahon Ganieva men 19 jastaǵy qyzy taksimen Ferǵana aryǵyna batyp ólý úshin barady. Osy mańdaǵy taksi júrgizýshileri boijetkendi ǵana qutqaryp úlgergen. Erli-zaiyptylar 42 jasta bolǵan.
Prokýratýra kúieýi men áieliniń óz-ózin óltirý faktisi boiynsha tergeýdi bastady. Olardy mundai qadamǵa ne itermelegeni áli belgisiz, deidi tergeýshiler. Oqiǵanyń jalǵyz kýágeri – taksi júrgizýshileri qutqaryp qalǵan qyzdyń jaǵdaiy nashar, ol suraqtarǵa jóndi jaýap bere almai otyr.
Pýlodon selolyq keńesi qyzmetkerleriniń biri erli-zaiyptylardyń 16 shildede jerlengenin habarlady.
"Olardyń nege óz-ózine qol jumsaǵanyn bilmeimin. Bilýimshe, Mýrodjon jáne Shoirahon 13 tamyzda ótýi tiis qyzynyń toiyna daiyndalyp jatqan. Kúieý bala Reseide jumys istep júr", — dedi ol.
Kanibadamdaǵy jýrnalisterdiń biri Feisbýktegi paraqshasynda erli-zaiyptylardyń nege sýitsidke barǵanyn jazypty. Aitýynsha, meditsinalyq tekseris kezinde qyzynyń páktigi tabylmaǵan.
Tájikstanda nekelesetin jastar meditsinalyq tekseristen ótip, ZAGS-ke densaýlyǵy jaiynda meditsinalyq anyqtama tapsyrýy tiis. VICh, gepatit jáne basqa da aýrýǵa shaldyqqandarǵa otbasy qurýǵa tyiym salynýy múmkin.
Ótken jyly Tájikstan turǵyndaryn 18 jastaǵy Radjabbi Hýrshedtiń ólimi eseńgiretip tastaǵan edi. Ol 24 jastaǵy kúieýimen toi bolǵan kúni tanysqan. Alǵashqy neke túninde-aq qyzdyń páktigine qatysty daý týyndaidy. Qalyńdyǵynyń tazalyǵyna kúmándanǵan jigit ony astanaǵa eki ret saraptamaǵa aparǵan. Ekinshi saraptama da qyzdyń toiǵa deiin pák bolǵanyn kórsetken, biraq kúieýi senbeidi. Toidan keiin qyryq kún ótkende qyz ýksýs iship óledi. Dárigerler kómek kórsetýge dármensiz boldy — Radjabbidiń búiregi istemei qalǵan.
Bul oqiǵadan keiin áieldiń jubaiy ony óz-ózin óltirýge jetkizgeni úshin 7 jylǵa sottalyp ketti.
Dástúrli tájik qoǵamynda boijetken turmys qurǵansha deiin pák bolýy kerek dep esepteledi, eger ol alǵashqy túni taza bolmai shyqsa, qyzdy masqara etip úiden qýyp shyǵady. Mundai qyzdardy ata-anasy da qabyldamaidy, sóitip qyzdar ómir boiyna abyroiynan aiyrylady.
