8 tamyz kúni QR Ulttyq mýzeiinde HH ǵasyrdyń eń tanymal jáne bedeldi sheberleriniń biri – Pablo Pikassonyń biregei kórmesi ashyldy.
Qazaqstan Respýblikasy Mádeniet jáne sport ministrligi uiymdastyrǵan «Pablo Pikasso. Volloristik Selestina men keramika» ekspozitsiiasy Astananyń 20-jyldyǵyna orai ótkizildi.
Kórmeniń ashylý saltanatynda sóz alǵan QR Mádeniet jáne sport ministri Arystanbek Muhamediuly: «Astana qalasynyń 20 jyldyǵyna orai arnaiy uiymdastyrylǵan «Pablo Pikasso «Selestina jáne Valoristyq keramika» halyqaralyq kórmesi – shoqtyǵy biik mádeni sharalardyń biri. Ulttyq mýzeidiń ashylǵanyna az ǵana jyldar bolsa da, osyndai dúniejúzine belgili tulǵalardyń kórmesin osy jerden kórip jatyrmyz. Ol biz úshin úlken qýanysh. Pablo Pikasso – tek sýret óneriniń ǵana emes, sonymen qatar, búkil tirshilik kóshiniń, jalpy adamzattyń damýyna úlken úles qosqan tulǵa. Myna ǵajaiyp álemniń sulýlyǵyn qylqalammen qaǵaz betine túsirip, oǵan erekshe ár bere bilý ekiniń qolynan keletin is emes. Sýret óneri – tabiǵat tartý etken talantty jandarǵa tiesili desek, Pablo Pikasso sondai talant iesi», – dedi.
Kórme barysynda qala qonaqtary men turǵyndary kórkem keramika men Pikasso graviýralarynyń sirek kórsetiletin kollektsiiasyn tamashalaýǵa múmkindik aldy. Qumyralar, tabaqshalar, saýyttar, ertegidegi qustar men miftik jaratylystar – uly sheber Ekinshi dúniejúzilik soǵystan keiin turaqtaǵan Frantsiianyń ońtústiginiń ǵalamat shýaqty peizajdaryndai kóz tartady.
Italiianyń Qazaqstandaǵy elshisi Paskýal D,Avino: «Búgingi sharanyń uiymdastyrylýy men úshin úlken qýanysh. Osyndai mádeni sharalar túrli ulttardyń bir arnada toǵysyp, ózara tildesýine, túsinisýine sebep ekeni anyq. Ulttyq mýzeige qoiylǵan búgingi kórmeniń mańyzy zor. Álemge áigili Pablo Pikassonyń jeke kórmesi Qazaqstanda tuńǵysh ret uiymdastyrylyp otyr. Kórkem týyndylar kóptiń kóńilinen shyǵyp, mýzei qonaqtaryn qýantady dep úmittenemiz», - dedi.
1946 jyly Volloriste jyl saiyn ótetin keramika kórmesine barǵan Pablo Pikasso, sol jerden shabyt alyp, tórt myńnan asa dekorativti keramikalyq forma jasaǵan. Pablo Pikasso tanys zattardyń ýtalitarlyǵyn biregeilik, daralyq pen kórkem týyndynyń siqyrlyǵymen biriktire aldy. Sheber kózeshi sharyǵyn paidalanbaǵan. Onyń saýyttary men keseleri óziniń ádeiilep jasalǵan formalarynyń arqasynda ádemi, tutas jáne tylsym hám tartymdy arhaikalyq músin ónerin eske túsiredi. Osy kóztartarlyq, minsiz pishinderge oi júgirtip qarasaq, ǵajaiyp qustar men ańdardyń tirilip, al túr-tússiz keramikadan jasalǵan músinderge jan bitip, adam keiipine enetinin elestetemiz, ádettegi qarapaiym obrazdar qaitalanbas tutas tarih retinde kóz aldymyzǵa keledi.
Pikassonyń bul jumystary – avtorlyq keramikanyń alǵashqy tájiribesi emes. Volloristik keramikanyń besigi – «Madýra» keramikalyq sheberhanasy áli kúnge deiin bar.
Madýra sheberhanasynyń buiymdaryn satyp alatyn kollektsionerlerdiń týyndylarynda mindetti túrde Edition Picasso («Pikosso qolynan shyqqan») jazýy men nómiri bar. Bul kórmege 32 túpnusqa eksponat usynyldy, olarǵa da joǵaryda atalǵan belgiler qoiylǵan.
Kórme 2018 jylǵy 3 qarashaǵa deiin jalǵasady.
