Sheteldikterge jerdiń satylmaityny, jalǵa berilmeitini jaily printsipialdy túrde qabyldanǵan sheshimdi úlken ortaq jetistigimiz dep bilemin. Bul pikirdi saiasattanýshy Rasýl Jumaly aitty, dep habarlaidy QazAqparat.
«Men buǵan deiin sóz etilgen ulttyq qaýipsizdik, saiasi, geosaiasi máselelerge qatysty aitylǵan oilarǵa tolyq qosylamyn. Sheteldikterge jerdiń satylmaityny, jalǵa berilmeitini jaily printsipialdy túrde qabyldanǵan túpkilikti sheshimdi úlken ortaq jetistigimiz dep bilemin. Árine, áli qordalanyp otyrǵan máseleler shash etekten, sonyń ishinde saiasi máselelermen qatar, jerdiń ekonomikalyq-áleýmettik mańyzy», - dep atap ótti saiasattanýshy Jer reformasy jónindegi komissiianyń birinshi otyrysynda.
Spiker Qazaqstannyń kólemi jaǵynan álemde 9-oryn alatynyn, halqynyń tyǵyzdyǵy boiynsha 193 eldiń arasynda 184-orynda ekenin eske saldy.
«Elimizde bir sharshy shaqyrymǵa 6 ǵana adamnan keledi. Biraq, shyntýaitynda aýyldaǵy diqandar men malshylarǵa jer jetpei jatady. Alyp jatqan jerimiz - Antarktida emes, Sahara emes, tyńaitýǵa, óńdeýge qolaily alqaptar. Biraq, ózimizdi aýyl sharýashylyǵy ónimderimen qatmamasyz ete almai jatyrmyz, ony mamandar, sarapshylar jaqsy biledi. Menińshe, bul – jer máselesiniń jaqsy rettelmeýiniń kórinisi, bizdiń talqylap otyrǵanymyz dál osy másele», - dedi Jumaly.
Sonymen birge, saiasattanýshy latifýndisterge qatysty shekteýler engizý bastamasyn qoldady.
«Iaǵni, 10 myń gektar emes, 500 gektar nemese basqa da meje belgilep, budan artyq alýǵa múmkindik joq deý kerek. Jerge jekemenshik máselesi – álbette óte sezimtal dúnie, onyń saiasi, sharýashylyq, ekonomikalyq astary bar. Óz basym túbinde jerdiń jeke menshikke ótýin qoldaimyn. Biraq dál qazir ondai sheshimniń qabyldanýy qanshalyqty qisyndy jáne negizdi, asyǵystyq bolmai ma? Meniń oiymsha, buǵan deiingi keleńsiz tájiribe bar, latifýndister, qos azamattyq, jerdi igere almai sýbarendaǵa berip, spekýliatsiiaǵa ainaldyrý, jerdi nesiege qaldyryp, shetelge aýyp ketkender dedik. Menińshe, eń aldymen sol jalǵa alýdyń, jeke menshikke alýdyń qosymsha alǵysharttaryn jasaý kerek. Osy eldiń azamaty sol jerdi igerip otyr ma, 20 jylda qandai nátije kórsetti, sondai qosymsha sharttardan keiin jalǵa alýdyń, jeke menshikke alýdyń úlken jaýapkershilikgin sezine otyryp, osy máselege nazar aýdarǵan jón siiaqty», - deidi Rasýl Jumaly.
