Nur-Sultan qalasynyń eks-ákimi Baqyt Sultanov áleýmettik jelidegi jazbasynda elorda jurtyna alǵys aitty, dep habarlaidy "Ult aqparat".
«Bul laýazymdy bosatyp, kezekti «shaqyrtýǵa» attanatyn kún de jetti. Kózdi ashyp-jumǵansha toǵyz ai óte shyqty. Toǵyz aida sábi de dúniege keledi. Osy ýaqyt ishinde ózim 20 jyldan astam turyp kele jatqan qalanyń sharýashylyǵy qanshalyqty kúrdeli ekenin, osynda ómir súrip, jumys istep jatqan jáne munda jaqsy ómir tabýǵa umtylǵan adamdardyń taǵdyry men armany alýan túrli ekenin túsindim. Osy ailarda turǵyndarmen óte kóp kezdestim, aldanǵan úleskerler, kópbalaly analar, múmkindigi shekteýli balalary bar otbasylardyń máselelerin sheshýge tyrystym. Kóptegen áleýmettik nysandar men tirshilikpen qamtamasyz etý uiymdaryna bardym», - dep jazdy ol Facebook-taǵy paraqshasynda.
B.Sultanovtyń aitýynsha, ol kóptegen túitkilderdiń sheshimi barlyq deńgeidegi biliktiń jumyla kirisýiniń nátijesinde múmkin ekenin túsingen.
«Árbir isti júzege asyrýdy sozbalaý, árine bolashaq úshin utymy joq. Sondyqtan da men jyldam ári biregei sheshim qabyldaýǵa tyrystym. Alaida, sheshimder siz ben bizdiń bárimizdiń oiymyzdaǵydai nemese der kezinde bola qoimaǵan bolsa keshirim ótinemin. Biraq balalarym men nemerelerim ósip jatqan qalaǵa degen sezimim kúsheie tústi. Qyzmetimniń ereksheligine qarai ótken 20 jyl ishinde qalanyń on paiyzyn da kórmegen ekenmin. Qalanyń shet-shetin aralap, máselelerdi sheshýge erekshe kóńil bólgenimnen keiin, «aǵashtyń japyraǵyna qarap, ormandy kórý kerek, al ormanǵa qarap, ondaǵy japyraqty kóre bilý qajet» degen eski danalyqty erekshe túsindim. Sondyqtan qaida bolsam da, qandai laýazymda bolaiyn, men ózimniń súiikti qalamnyń máselelerin sheshýge jáne qarqyndy damýyna árqashan kómektesýge tyrysamyn. Óitkeni, biz álemdik astanalardyń biri bolýyna umtylamyz», - dedi ol.
Sondai-aq, B.Sultanov qala turǵyndaryna alǵys aitty.
«Búginnen bastap men ózimdi belsendi ári «tájiribeli» qala turǵyndarynyń qataryna qosamyn. Men elorda basshysy qyzmetinde bolǵan kezde maǵan qoldaý kóretken, aldyma kúrmeýli máseleni aityp, sheshimin talap etken barshańyzǵa zor alǵysymdy bildiremin. Bul men úshin asqan jaýapkershilikke toly tájiribe boldy», - dedi ol.
Eske sala ketsek, búgin QR Prezidenti Qasym-Jomart Toqaevtyń Jarlyǵymen Altai Kólginov Nur-Sultan qalasynyń əkimi bolyp taǵaiyndaldy.
B. Sultanov elorda əkimdiginiń basshylyǵyna 2018 jyldyń 11 shildesi kúni kelgen bolatyn.
