Foto: ozenmunaigaz.com
23 maýsymda Aqtaý qalasynda Mańǵystaý oblysynyń Qoǵamdyq kommýnikatsiialar ortalyǵynda brifing ótip, onda «QazMunaiGaz» UK AQ (QMG) arnaiy jumys tobynyń «Ózenmunaigaz» AQ (ÓMG) jáne onyń merdiger uiymdarynda júrgizilgen tekserý jumystarynyń negizgi qorytyndysy jariialandy, dep habarlaidy "Ult aqparat".
Kompaniia baspasóz qyzmetiniń málimetinshe, brifingke QMG Basqarma tóraǵasynyń orynbasary, Jumys tobynyń jetekshisi Dáýletjan Hasanov, QMG Ekonomikalyq jáne ishki qaýipsizdik bóliminiń bastyǵy Ádil Atabaev, QMG Adami resýrstardy basqarý departamentiniń bas mamany Baqdáýlet Tólegen, QMG Munai jáne gaz óndirý departamentiniń bas mamany Jiger Jókebaev qatysqan.
Jumys tobynyń basshysy «Ózenmunaigaz» AQ qyzmetine korporativtik ortalyq deńgeiinde keshendi tekserý júrgizý byltyrdan beri josparlanǵanyn aitty.
«Biz enshiles mekemelerdiń kásipodaq ókilderimen tyǵyz jumys istei bastadyq. Tek byltyrdyń ózinde Ózenmunaigazdyń kásipodaq jetekshilerimen jáne múshelerimen birqatar kezdesý ótkizdik. Olar ózderin tolǵandyrǵan suraqtaryn qoiyp, jumysshylardyń aryz-shaǵymdaryn jetkizdi. Sol sebepti keshendi tekserýdi sol kezde josparlaǵan edik, al «BerÁli Mańǵystaý Company» JShS jumysshylarymen bolǵan jaǵdai tekserýdi keiinge qaldyrmai bastaýǵa túrtki boldy», — dedi ol.
Jumys tobynyń quramy
Arnaiy jumys toby QMG-niń, enshiles jáne táýeldi mekemelerdiń 50-den astam qyzmetkerlerinen qurylǵan. Sarapshy retinde Densaýlyq saqtaý ministrligi (17), Tótenshe jaǵdailar ministrligi (6), Ekologiia jáne tabiǵi resýrstar ministrligi (5), Eńbek jáne áleýmettik qorǵaý ministrliginiń (18) ókilderi shaqyrylǵan. Sharýashylyq qyzmettiń 55 nysanyna, sonyń ishinde ÓMG-niń 17 óndiristik qurylymdyq bólimshesi, QMG-niń 8 munai servis mekemesi jáne 30 merdiger uiym boiynsha taldaý jumystary júrgizilgen.
Quqyq qorǵaý organdaryna berilgen faktiler
ÓMG-niń qarjy-ekonomikalyq qyzmetin taldaý nátijeleri boiynsha 118 buzýshylyq pen sáikessizdik anyqtaldy, sonyń ishinde:
7 fakt quqyq qorǵaý organdaryna berildi;
10 másele boiynsha qyzmettik tergeý júrip jatyr;
101 másele boiynsha jaýapty adamdarǵa tártiptik jaza qoldanylady.
Odan keiin jumys tobynyń ókilderi quqyq qorǵaý organdaryna berilgen 7 faktiniń árqaisysyna jeke-jeke toqtalyp ótti. Máselen, ÓMG-dyń jalǵan túrde syrttan jumysshylardy jaldaǵany týraly aqparat tekserildi. ÓMG-ǵa keltirilgen shyǵyn kólemi aldyn ala esep boiynsha, 47 mln teńge shamasynda ekeni anyqtaldy.
Sonymen qatar 2022-2023 jj. ÓMG jáne «BerAli Mangistaý Company» JShS arasynda jasalǵan kelisimshartqa sáikes, oryndalǵan jumys aktilerine taldaý júrgizý nátijesinde jumys ýaqyty shamadan tys, 311 brigada-saǵatty nemese 27,8 mln teńgeni qamtyǵany, sondai-aq, 69 mln teńge kóleminde jumystyń oryndalmaǵany anyqtaldy. Nátijesinde 97 mln teńge artyq tólendi.
Jumysqa qabyldaý algoritmi buzylǵan
Odan bólek, ÓMG kompaniiasyna jumysqa alý algoritmi buzylǵany anyqtaldy. Bekitilgen erejege sáikes, jumys izdeýshiler kezegi kelgende aldymen qalanyń kommýnaldy kásiporyndarynda qyzmet etip, keiin ÓMG aýtstaffinginde (syrttan jaldanyp) jumys istegen soń kompaniiada bos oryndar paida bolǵan kezde ǵana shtatqa qabyldanýy tiis. Mysaly, jumysqa qabyldanýy tiis ákimshiliktiń tizimine kirgen 44 adam qalanyń kommýnaldy kásiporyndarynyń tiziminde joq bolyp shyqty («ÓzenInvest» MKK, «Taza sý» JShS jáne «Verity Group» JShS). Anyqtalǵan fakt boiynsha materialdar Jańaózen q. prokýratýrasyna jiberildi.
Tekserý nátijesinde sirek qoldanystaǵy mamandyq iesi retinde jumysqa qabyldanǵan 238 adamnyń 17-niń biliktiligi joq bolyp shyqty. Taǵy 33 adam qysqa merzimde kompaniiadaǵy ózge qyzmetterge aýysyp ketken. Demek, sirek qoldanystaǵy mamandyq iesine degen suranysty shtatqa qabyldanýdyń amaly retinde paidalanǵan.
Sonymen qatar, Mańǵystaý oblysy oqý oryndarynyń jalǵan sertifikattary ÓMG kompaniiasynyń shtatyna kirý úshin paidalanylǵany týraly faktiler de tiisti organdardyń tekserýine jiberildi.
Odan bólek, «Ózenmunaigaz» AQ Korporativti oqý ortalyǵynyń hattamasynda komissiia músheleriniń atynan áldekimder jalǵan qol qoiyp, jumysqa qabyldaý protsedýrasynan ótpegen adamdardy injener qyzmetine qabyldaǵany týraly fakti anyqtaldy.
Jýrnalister aldynda sóz sóilegen B.Tólegen ÓMG kompaniiasyna jumysqa qabyldaý erejelerin óreskel buzýshylar belden basyp, ádildikten attap, sybailas jemqorlyqqa negiz bolǵan zańsyz áreketterge barǵany týraly kúdik týǵyzyp otyr. Bul, óz kezeginde, eki qolǵa bir kúrek taba almai júrgen Jańaózen qalasy turǵyndarynyń arasynda áleýmettik narazylyq týdyrdy.
Ishki kommýnikatsiia máselesi
Spikerler «Ózenmunaigaz» kompaniiasyndaǵy ishki kommýnikatsiianyń álsiz tustaryna bólek toqtalyp ótti. Eńbek ujymdarymen esep berý kezdesýleriniń ýaqytyly ótkizilmeýi nemese múldem bolmaýy aqparat keńistiginde ÓMG týraly jalǵan nemese kompaniianyń bedelin túsiretin málimetterdiń paida bolýyna sebep bolǵan. Jumysshylar kompaniianyń naqty jaǵdaiynan habardar emes, oǵan qatysty ózekti máselelerdi sheshýge aralaspaidy. Mysaly, ÓMG ujymy úshin kompaniianyń kúrdeli qarjylyq jaǵdaiy týraly aqparat kútpegen jaǵdai boldy. Osyǵan bailanysty búgingi tańda ishki kommýnikatsiia mádenietin kóterý boiynsha jospar ázirlendi, Kompaniia basshylyǵynyń ujymmen jeke kezdesýleriniń kestesi bekitildi.
Óndiristegi túitkilder
Budan ári jumys tobynyń jetekshisi D.Hasanov ÓMG-niń óndiristik protsesterin tekserý qorytyndylaryna, onyń ishinde kólikpen qamtý jáne uńǵymalardy jerasty jóndeý máselelerine toqtaldy. Atap aitqanda, jumys ornynan ýaqytynan buryn ketý jáne kólikti garajǵa erte ótkizý faktileri anyqtalǵan. Birqatar basqarmada 2023 jyldyń 4 aiynda shamamen jumys ýaqytynyń 170 000 saǵaty oryndalmaǵan, óndiristen tys shyǵys mólsheri shamamen 1,2 mlrd teńgeni quraǵan. Burǵylaý jumystary basqarmasynda 205 avtokóliktiń 199-yna GPS-treker ornatylǵan, alaida olardyń tek 70-i jumys istep tur.
Sonymen qatar, uńǵymalardy jerasty jóndeý jumystary barysynda tehnologiialyq reglamenttiń saqtalmaýy baiqalady. Uńǵymalardy jerasty jóndeý brigadasy jospardy oryndaý úshin kenjardy jýý/ tazartý jáne uńǵymalardy sapaly sóndirý sekildi negizgi jumystardy sirek atqarǵan.
Odan bólek, uńǵymalardyń toqtap qalýyna jol bermeý úshin jóndeý aralyq kezeńde profilaktikalyq jáne reanimatsiialyq jumystar oryndalmaidy.
Jóndeý brigadalary qabyldaý kópirleri, preventorlar, sharly krandar, gidrokiltter, spaiderlermen durys qamtylmaǵan. Munyń barlyǵy uńǵymalardyń beriktigi men qaýipsizdigine áser etedi.
Satyp alýdaǵy olqylyqtar
Satyp alý jáne óndiristi qamtý salasynda da olqylyqtar anyqtaldy. Máselen, tekserý kezinde 2023 jylǵa arnalǵan satyp alý jospary 65%-ǵa oryndalǵan, sonyń ishinde taýar pozitsiialary boiynsha bar-joǵy 58% qamtyldy, iaǵni taýar usynystarynyń 42% boiynsha kelisimsharttar jasalmaǵan. Kelisimshart jasalǵan 61 pozitsiia boiynsha oryndaý merzimi saqtalmaǵan. Tender qujattamasynyń nashar ázirlenýine bailanysty qyzmet kórsetý men jumystar boiynsha 14 satyp alý usynysy toqtatyldy.
Der ýaqytynda oryndamaýdyń basty sebepteri — taýar baǵalarynyń álsiz marketingi, tehnikalyq qujattardyń sapasyz ázirlenýi, baqylaýdyń nashar bolýy jáne jabdyqty jasap shyǵarý protsesin sol jerge baryp baqylaý tájiribesiniń joqtyǵy.
Kelisimshart jasalyp qoiǵan pozitsiialar boiynsha keshiktirip oryndaý faktileri de anyqtaldy. Tekserý kezinde jyldyq kólemniń 36% ǵana oryndalǵan, keshiktirýdiń negizgi sebebi — mindetterdiń oryndalýyna baqylaýdyń joqtyǵy, mindetterin oryndamaǵany úshin kelisimshartty buzý jaǵdailary tirkelmegen.
Joǵaryda atalǵan derekterdiń barlyǵy túptep kelgende taýarlar men materialdyq quraldardyń jetispeýshiligin, óndiristi ýaqtyly qamtamasyz etpeý jáne eńbek ujymdary arasynda narazylyqtyń órshýine negiz boldy.
Brifing barysynda spikerler eskertýler men kemshilikterdi joiý boiynsha josparlarymen bólisip, jýrnalisterdiń suraqtaryna jaýap berdi.
«Kórip otyrǵandaryńyzdai, jumys toby aýqymdy, keshendi jumys atqardy. Anyqtalǵan birqatar buzýshylyq boiynsha materialdar quqyq qorǵaý organdaryna jiberildi. Qazir naqty baǵyttar boiynsha kemshilikterdi joiý maqsatynda jospar ázirlenip jatyr. Olardyń keibiri tereń júielik sipatta bolady. Olardy sheshý úshin, birinshiden, ýaqyt, ekinshiden, qosymsha qarjy qajet. Sondyqtan bul jumysty aldaǵy birneshe jylda Ózenmunaigazben birlese otyryp atqaramyz», — dep túiindedi QMG Basqarma tóraǵasynyń orynbasary Hasanov.
