Sóz bostandyǵy, qaýymdastyq jáne jiyn erkindigi bar, táýelsiz BAQ damyǵan qoǵamdarda áleýmettik jeli adamdardyń óz jaqyndary men dostarynyń arasynda ómirinde bolyp jatqan oqiǵalarmen bólisý alańy rólin atqarady. Al áleýmettik jeliler qoǵamdy tolǵandyratyn ózekti máselelerdi talqylaý úshin paidalanylsa, onda bul qoǵamda balama pikir almasý alańdary men aqparat jetkizý quraldarynyń jetkiliksizdigin, azamattyq qoǵam damýyndaǵy qiyndyqtardy kórsetedi. Bul týraly Memlekettik qyzmet salasyndaǵy óńirlik hab basqarý komitetiniń tóraǵasy Álihan Baimenov málimdedi, dep habarlaidy Baq.kz tilshisi.
«Buǵan deiin biznesti damytýda memlekettik - jeke menshik áriptestikti aityp kelsek, qoǵamdy damytýda memlekettik - azamattyq áriptestikti aitý kerek. Ózderi kótergen ózekti máselelerdi sheshýde azamattyq uiymdar memlekettik organdardyń áriptesi bola alady. Bul turǵyda memlekettik qyzmetshiler azamattyq qoǵam belsendilerin el janashyrlary retinde qarap, baǵalaýy mańyzdy. Sebebi qara qan bastyń qamynan biiktep, jaily ómir aǵynynan bas tarta otyryp, elde týyndaǵan ózekti máselelerdi qoǵamdyq negizde kóterip júrgen azamattardyń ishki qozǵaýshy kúshin ótken ata-baba árýaǵy men bolashaq urpaq aldyndaǵy jaýapkershilik, óz eline degen súiispenshilik dep túsiný kerek. Óz halqyn sheksiz súigendikten de uly Abai óziniń óleńderi men qara sózderinde el ishindegi ózekti máselelerdi kótergeni barshamyzǵa málim. Sondyqtan da rýhani jańǵyrý men qoǵamdyq sanany modernizatsiialaý isinde memlekettik qyzmetshilerdiń azamattyq belsendilerdi el janashyrlary dep qabyldap, oń kózqarasyn qalyptastyrý – mańyzdy is», - dedi Baimenov.
Ol kóp jaǵdaida azamattyq uiymdar ózderi kótergen máselelerdi sheshý úshin tiisti deńgeidegi resýrstarǵa muqtaj ekenin atap ótti.
«Olarǵa járdem kórsetý isinde halqymyzdyń quramyndaǵy orta tap pen orta, shaǵyn jáne memlekettik satyp alýlarǵa táýelsiz biznestiń damyǵany mańyzdy. Rasynda, ekonomika qurylymdary sekildi azamattyq qoǵam uiymdarynyń kóshbasshylary da memlekettik tapsyrys boiynsha týyndap, óspeidi. Onyń dáleli retinde keshe ǵana bir maqalaǵa jaýap retinde meniń jazǵanym bar edi. Amazon, Facebook, Google, Apple – álemdegi eń úzdik kompaniialar. Olar memlekettik tapsyryspen ósken joq, memlekettik tender utyp alý arqyly qalyptasqan joq. Qaita bul kompaniialar naryqtaǵy óz ornyn alǵan soń baryp memlekettik organdar olardyń ónimderine muqtaj bola bastady. Sol sebepten memlekettik granttardyń maqsaty ne, olardyń órbýinde qandai tazalyq, adaldyq bolýy kerek degen másele tujyrymdamada óziniń naqty jaýabyn tabýy kerek dep oilaimyn», - dedi memlekettik qyzmet salasyndaǵy óńirlik hab basqarý komitetiniń tóraǵasy.
Onyń aitýynsha, shaǵyn, orta biznesti, azamattyq uiymdardy qarqyndy damytý úshin qolaily jaǵdai jasaý, zań ústemdik jasaityn adal jáne teń básekelestik ortany qalyptastyrý memlekettiń negizgi maqsaty bolýy tiis. Sondai-aq, memlekettik organdar olardyń bastamasyna oń kózqaraspen qarap, shek qoimai, kerisinshe barynsha qoldaý kerek.
«Azamattyq belsendilikti júzege asyrý jańa tehnologiialardy paidalanýdy qajet etedi. Sóz bostandyǵy, qaýymdastyq jáne jiyn erkindigi bar, táýelsiz BAQ damyǵan qoǵamdarda «feisbýk» jelisi Tsýkerberg aitqan róldi atqarady. Al eger áleýmettik jeliler qoǵamdy tolǵandyratyn ózekti máselelerdi talqylaý úshin paidalanylsa, onda bul qoǵamda balama pikir almasý alańdary men aqparat jetkizý quraldarynyń jetkiliksizdigin, azamattyq qoǵam damýyndaǵy qiyndyqtardy kórsetedi. Iaǵni bul azamattyq qoǵamnyń damýynyń barometri nemese lakmýs qaǵazy dep aitýǵa bolady. Elbasy álemdegi 30 eldiń qataryna qosý mejesin qoidy. Eger muqiiat qarasańyzdar sol 30 eldiń basym kópshiligin biriktirip turǵan erekshelik ol – damyǵan azamattyq qoǵam. Osy turǵydan alǵanda keleshek tujyrymdamada jáne ózderińizdiń isterińizdi baǵalaýda «sirikýs» indeksine nazar aýdarǵym keledi. Zań men tujyrymdamalar óskeleń adamǵa pishilgen kiim sekildi, ol adamnyń, qoǵamnyń ósýin qamtamasyz etip, alǵa qarai qimylyn shektemegen abzal. Bul – bizdiń barlyǵymyzdyń ortaq jaýapkershiligimiz, osy iste barlyqtaryńyzǵa tabys tileimin», - dep sózin túiindedi ol.
