Qazaqstan Respýblikasynyń Aqparat jáne qoǵamdyq damý ministri Aida Balaeva Tashkent qalasynda Ózbekstandaǵy qazaq mádeni ortalyqtarynyń ókilderimen kezdesti, dep habarlaidy "Ult aqparat".
Kezdesý barysynda ministr Memleket basshysy Qasym-Jomart Toqaev jaqynda bolǵan Qazaqstan halqyna Joldaýynda kóshi-qon saiasatynyń jańa tujyrymdamasyn ázirleýge bastama bergenin, sondai-aq, jalpy tarihi Otanyna keletin qandastardyń beiimdelýine járdemdesýge qabiletti suraqtar ózektendirilgenin aitty.
Budan basqa, Aida Balaeva osydan buryn qandastarǵa Qazaqstan azamattyǵyn alý boiynsha tiisti qujattardy berý, qandastar qataryndaǵy jastar úshin Qazaqstannyń joǵary oqý oryndarynda beriletin kvotalar týraly memlekettik qyzmetter kórsetý rásimi men merzimderi aitarlyqtai jeńildetilgenin atap ótti.
Sonymen qatar, Aida Balaeva qazaq halqynyń mádenieti men tilin saqtaýdyń mańyzdylyǵyn atap ótti. Eske sala keteiik, Ózbekstanda álemdegi iri qazaq qaýymdastyqtarynyń biri turyp jatyr jáne ótken jyly Qazaqstannyń Aqparat jáne qoǵamdyq damý, Syrtqy ister ministrlikteriniń qoldaýymen osy eldiń astanasy Tashkentte "Abai Uii" mádeni-iskerlik úii ashyldy.
Ministrmen kezdesýge Ózbekstandaǵy qazaq jurtshylyǵynyń kórnekti ókilderi, onyń ishinde respýblikalyq Qazaq ulttyq mádeni ortalyǵynyń tóraǵasy S.Úsenov, akademik, professor Q.Seidanov jáne basqalar qatysty.
