Túrkistan oblysyndaǵy 5 kedendik beketten ótken 4 myńnan asa jolaýshy men júrgizýshi karantindik tekserýden ótkizildi. Ózbekstannan kelgen azamattardan arnaiy synamalar alynyp, 6 adamnan koronavirýs anyqtalǵan, dep habarlaidy "Ult aqparat".
Oblystyq taýarlar jáne qyzmetterdiń sapasy men qaýipsizdigin baqylaý departamentiniń basshysy Nurbek Nyshanovtyń aitýynsha, 6 qazannan beri shekaradan ótken azamattardan virýs týraly anyqtamasy talap etilýde. Anyqtama bolmaǵan jaǵdaida eki kúndik karantinge jatqyzylýda. Olardan arnaiy synamalar alynyp, búginde 406 adam statsionarlyq karantinge ornalastyrylǵan. Onyń ishinde 6 adamnan koronavirýs anyqtalǵan. Klinikalyq kórsetkish boiynsha bir naýqas aýrýhanaǵa jatqyzylǵan. 5 adamda aýrý simptomsyz bolǵandyqtan, úi jaǵdaiynda emdelýge jiberilgen. Óńirde sońǵy táýlikte qaýipti indet 1 adamnan anyqtalyp, 1500 adam ptsr testtileýden ótkizilgen.
«Osy indettiń aldyn alý úshin keshegi táýlikte 1530 adam tekserilip, onyń ishinde bir jaǵdaida anyqtalyp otyr. Oblys kóleminde zerthanalardyń qýattylyǵy 1470 bolsa, qosymsha taǵy 5 zerthana jumysqa qosylý ústinde», - deidi Nurbek Nyshanov.
Departament basshysynyń aiýynsha, oblys kóleminde qurylǵan 53 mobildik top karantindik talaptardy saqtaýǵa qatysty reidtik sharalardy turaqty túrde júrgizýde. Osynaý tekserýler kezinde erejeni eskermeýdiń 2987 jaǵdai tirkelip, olarǵa qatysty 150 mln teńgeden asa aiyppul salynǵan. 9 laýazymdy jáne 10 zańdy tulǵaǵa, sondai-aq 75 kásipkerge qatysty ákimshilik is qozǵalǵan. Salynǵan aiyppuldardyń 125 mln teńgesi biýdjetke óndirilip, karantin kezinde toi jasaýshylarǵa da tiisti sharalar qoldanylǵan.
