Aǵymdaǵy jyldyń 8 aiynda Ózbekstan Qazaqstanǵa jalpy kólemi 763,9 myń dollar bolatyn jihaz ónimderin eksporttaǵan, dep habarlaidy "Ult aqparat" Ózbekstan Respýblikasynyń memlekettik statistika komitetiniń saityna silteme jasap.
«2020 jyldyń 1 qyrkúiegindegi derekter boiynsha, Ózbekstannyń shet elderge eksporttaǵan jihaz ónimderiniń jalpy somasy 2 mln dollardy qurady. Bul 2019 jyldyń osy kezeńimen salystyrǵanda 841 myń dollarǵa kóp. Sońǵy segiz aida eksporttalǵan jihaz ónimderinń eń kóp úlesi Qazaqstanǵa (763,9 myń dollar), Qyrǵyzstanǵa (619,3 myń dollar), Tájikstanǵa (294,2 myń dollar) jáne Reseige (146,6 myń dollar) tiesili», - dep málimdedi Ózbekstan Respýblikasynyń memlekettik statistika komiteti.
Sondai-aq, 8 ai qorytyndysy boiynsha Ózbekstannan Qazaqstanǵa eksporttalǵan shyny ydystar men shyny buiymdardyń jalpy somasy 7,4 mln dollardy quraǵan.
«2020 jyly Ózbekstan 14 memleketke 11,6 mln dollardyń shyny ydystary men shyny buiymdaryn eksporttady. Onyń basym bóligi Qazaqstan (7,4 mln dollar), Túrikmenstan (1,9 mln dollar), Tájikstan (976,5 myń dollar), Qyrǵyzstan (589,7 myń dollar), Grýziia (435,4 myń dollar) jáne Resei Federatsiiasy (204,1 myń dollar) úlesine keldi», - dep jazdy Ózbekstan Respýblikasynyń memlekettik statistika komiteti.
Budan ózge, 8 ai ishinde Qazaqstan Ózbekstanǵa 47,7 mln litr benzin eksporttaǵan.
«2020 jyldyń 1 qyrkúiegindegi málimetter boiynsha, Ózbekstan shet elderden 90,1 mln litr benzin importtady. Bul kórsetkish ótken jyldyń sáikes kezeńimen salystyrǵanda 87 mln litrge artyq. Ózbekstan janar-jaǵarmaidy eń kóp kólemde Qazaqstannan (47,7 mln litr), Reseiden (36,5 mln litr), Túrikmenstannan (5,6 mln litr) jáne Qyrǵyzstannan (232,1 myń litr) satyp aldy», - dep málim etti Ózbekstannyń memlekettik statistika komiteti.
