«Qazaqkontsert» memlekettik kontserttik uiymynyń óner ujymdary el óńirlerine keremet tartý jasamaq, dep habarlaidy "Ult aqparat".
60 jyldyq tarihy bar «Qazaqkontsert» uiymynyń «Astana sazy» jáne «Saz&soul» ansamblderi halyq súiip tyńdaityn tańdaýly týyndylar men jańa shyǵarmalardan turatyn «Qazaqkontsert shaqyrady» kontsertin usynady. Eki ansambldiń birlesken kontsertine elimizdiń talantty mýlti instrýmentalist mýzykanttary, qazaq mýzykasynyń damýyna jańasha lep ákelgen kompozitorlar Baýyrjan Aqtaev pen Ádiljan Tolyqpaev jetekshilik etedi.
«Qazaqkontsert» ujymdary qazaqtyń dástúrli mýzykasy men estrada óneri sheber úilesim tapqan, Uly dalanyń kóne mýzykalyq saryndary zamanaýi jańa formatta jańǵyratyn erekshe kontsertti usynady.
Kontsertte halyq ánderi, Qurmanǵazy, Aqan seri, Jaiaý Musa, N.Tilendiev, J.Jabaev, K.Ázirbaev, A.Qorazbaevtyń belgili kompozitsiialary jańa formatta oryndalady. Qos ansamblmen birge sahnada Qazaqkontsert solisteri Erbolat Shaldybekov jáne Qairat Sarybaev óner kórsetpek. Óner súier qaýym qazaq mýzykasynyń ulylyǵyn, Uly Dalamyzdyń keńdigin pash etetin sazdy áýenderdi tyńdai alady.
Óner ielerin alǵash bolyp Almaty qalasynyń jurtshylyǵy qarsy alady. Almaty qalasyndaǵy kontsert 2 qarasha kúni Qurmanǵazy atyndaǵy Qazaq memlekettik akademiialyq halyq aspaptar orkestriniń kontsert zalynda ótedi. Odan keiin gastroldik kerýen Shymkent qalasynda jalǵasyn tabady. Shymkent qalasynyń óner súier qaýymy «Qazaqkontsert shaqyrady» kontsertin 4 qarasha kúni Shámshi Qaldaiaqov atyndaǵy oblystyq filarmoniiada tamashalai alady.
«Ónerdiń ozyq úlgilerin halyqqa qoljetimdi etý maqsatynda «Qazaqkontsert shaqyrady» kontserti tegin ótkiziledi. Buǵan qosa, kontsert kórermenderge tek rýhani azyq syilap qana qoimai, kásibi jas mýzykanttarǵa da jaqsy tálimgerlik úlgi bolmaq. Qazaqkontserttiń respýblika óńirlerindegi gastroldik sapary halyqaralyq gastrolderge jalǵaspaq. QR Mádeniet jáne sport ministrliginiń qoldaýymen ótetin osy úlken gastroldik sapardyń sońǵy núktesi – Tashkent qalasy», - dedi «Qazaqkontsert» uiymynyń direktory Jeńis Seidýllauly.
Ózbekstandaǵy Qazaqstan jyly aiasynda Tashkent qalasynyń kórermenderin Qazaqkontsert solisi, Qazaqstannyń halyq ártisi Maqpal Júnisova jáne «Astana sazy» men «Saz&soul» ansamblderi óz ónerimen qýantpaq.
