Foto: © Sputnik / Evgenii Odinokov
Májilistiń jalpy otyrysynda «Qazaqstan men Ózbekstan arasyndaǵy bas bostandyǵynan aiyrýǵa sottalǵan adamdardy jazasyn odan ári óteý úshin berý týraly shartty ratifikatsiialaý týraly» Zańy qabyldandy, dep habarlaidy QazAqparat agenttigi.
«Bul shart elimizdiń Konstitýtsiiasynda bekitilgen talaptardy júzege asyrýǵa baǵyttalǵan. Elimizden tys aýmaqta júrgen azamattardy qorǵaýǵa jáne olarǵa qamqorlyq jasaýǵa kepildik berilgen. Eki eldiń arasyndaǵy shart atalǵan normalardy iske asyrýǵa baǵyttalǵan. Osy mándegi norma Ózbekstan Konstitýtsiiasynda da bar. Bul kelisim eki eldiń bir-birine degen seniminiń belgisi. Atalǵan qujatqa qol qoiý úshin birneshe jyl kelissóz júrgizildi. Shartqa qol qoimas buryn eki el arasyndaǵy migratsiialyq protsess jáne qylmystyq ahýal zerdelendi», - dedi QR Bas prokýrorynyń orynbasary Áset Shyndaliev.
Osy oraida ol bul sharttyń áleýmettik mańyzy bar ekenin aitty.
«Otbasy múshelerimen, jaqyndarymen kezdesip tursa, sottalǵan adamǵa oń yqpal etetini sózsiz. Sottalǵandardy túzetý maqsaty tek qana ony jazalaý emes, sonymen birge tárbielik yqpal etý, áleýmettik bailanystardy saqtaý. Shart erejesine toqtalsaq, sottalǵan adamdy berý úshin, eń aldymen, onyń kelisimi qajet. Ol jazasyn óz elinde óteitini týraly ótinish berýi tiis. Qazir bizde sottalǵan 225 Ózbekstan azamaty óz elinde jazasyn óteý týraly ótinish bildirip otyr. Iaǵni osy másele boiynsha sottalǵandar arasynda arnaiy saýalnama júrgizgenbiz», - dedi Bas prokýrordyń orynbasary.
Sonymen qatar ol Ózbekstanda sottalǵan Qazaqstannyń 20 azamaty bar ekenin aitty.
«21 memleketpen osyndai shartty bekittik. Qujat biýdjetten qosymsha qarajat talap etpeidi. Ony júzege asyrý ekonomikalyq, áleýmettik jáne quqyqtyq teris saldarǵa ákep soqpaidy», - dedi Shyndaliev.
