Ózbekstan densaýlyq saqtaý ministrligi taratqan málimetterge qaraǵanda, elde koronavirýs juqtyrǵandar eki esege ósken.
Aqparatqa qaraǵanda, Tashkent oblysy Záńgiata aýdanynda pandemiia kezinde arnaiy salynǵan eki juqpaly aýrýlar aýrýhanasynda oryn joq.
№1 aýrýhana direktorynyń orynbasary Olimjon Ishakovtyń "Ózbekstan 24" telearnasyna habarlaýynsha, 2 myń adamǵa shaqtalǵan mekemede 2550 naýqas jatyr. Onyń aitýynsha, munda kúnde shamamen 350 adam túsedi. Aýrýhana tolyp qalǵandyqtan, munda naýqastardy qabyldaý toqtaǵan.
Áleýmettik jelilerde taraǵan videolarǵa qaraǵanda, aýrýhanada tórt adamǵa shaqtalǵan palatada qazir alty-segiz adamnan jatyr.
Tashkent qalasynyń basshysy Jahongir Artykhojaev astanadaǵy tórt kovid-ortalyqty iske qosýdy tapsyrdy.
Úkimet karantin shekteýlerin kúsheitýge májbúr boldy. Respýblikada táýligine orta eseppen úsh adam koronavirýstan qaitys bolady.
Soǵan qaramastan, densaýlyq saqtaý ministrligi koronavirýstyń jańa tolqyny kelgenin jariialaýǵa asyǵar emes.
Biyl 24 maýsymda Ózbekstanda koronavirýstyń asa juqpaly "delta" shtammy tirkelgeni habarlanǵan edi.
Resmi málimet boiynsha, 6 shildede Ózbekstanda 496 adamnan koronavirýs anyqtalǵan. Indet bastalǵaly beri 114 myńnan astam adamǵa Covid juqqan. 754 adam qaitys bolǵan.
