Ózbekstannyń Qashqadariia oblysy aýmaǵyndaǵy «Okrabot» mahalliasynda (shaǵynaýdan) Aleksandr Makedonskii saldyrǵan ejelgi bekinister tabyldy, dep habarlaidy "Ult aqparat" «Xalq so'zi» gazetiniń saityna silteme jasap.
Óz dáýirinde Orta Aziiany jaýlaǵan áigili qolbasshy Aleksandr Makedonskii Ózbekstannyń qazirgi Dehkanabad aýdany aýmaǵynda qystap, ózine jáne sarbazdaryna arnap grek stilinde bekinis turǵyzǵan.
«Bul bekinis ǵasyrlar boiy mújilip, qazir onyń tek keibir bólikteri saqtalǵan. Onyń qiraǵan, synǵan jerlerine kezinde Resei imperatory Nikolai II jóndeý jumystaryn júrgizgen», - deidi Respýblikalyq rýhaniiat jáne aǵartý ortalyǵy Dehkanabad aýdandyq filialynyń jetekshisi Renat Kýziboev.
Bekinis ejelgi Uly Jibek joly boiynda salynǵan jáne sol kezeńdegi strategiialyq mańyzǵa ie meken bolǵan. Jergilikti tarihshylardyń aitýynsha, erekshe stilde turǵyzylǵan sáýlet óneri tolyq zertteýdi qajet etedi.
