Ózbekstan Syrtqy ister ministrligi Aýǵanstanda ózbek tiline tyiym salynǵany jóninde Facebook áleýmettik jelisinde taraǵan aqparatty teriske shyǵardy. Bul týraly Ózbekstan Syrtqy ister ministrliginiń resmi ókili Iýsýp Kabýljanov málimdedi, dep habarlaidy Azattyq.
"Ózbekstan Syrtqy ister ministrligniń ókili sóilesken tálipter basshylyǵy bul aqparattyń jalǵan ekenin aitty" delingen málimdemede.
Iýsýp Kabýljanovtyń sózine qaraǵanda, "Taliban" (Qazaqstan aýmaǵynda tiym salynǵan terroristik qurylym) pýshtý jáne dari tilderimen qatar ózbek tili de Aýǵanstandaǵy resmi tilderdiń biri bolyp qala beretini jóninde ýáde bergen.
"Eldiń jańa basshylyǵy ózbek tilin oqytý men damytýǵa airyqsha nazar aýdaratyn boldy", – deidi Ózbekstan Syrtqy ister ministrliginiń ókili.
Buǵan deiin ózbek tarihshysy Ánýar Názir Facebook paraqshasy arqyly "tálipter Aýǵanstan mektepterindegi oqý baǵdarlamasynan ózbek tilin aldy, ózbek tiliniń júzdegen muǵalimin jumysynan bosatyp, kitaphanalardan ózbek avtorlarynyń kitabyn shyǵaryp tastady" degen aqparat taratqan.
Resmi derekterde Aýǵanstandaǵy halyq sany 32 millionnan asady. Ortalyq Aziiada Ózbekstan, Tájikstan, Túrikmenstanmen shektesedi. Aýǵanstanda osy elderdiń iri diasporalary bar.
15 tamyzda "Taliban" qozǵalysy Kabýldy soǵyssyz alǵan soń, Aýǵanstanǵa tolyq baqylaý ornatqanyn málimdegen. Alaida tálipterge moiynsunǵysy kelmeitin kúshter Aýǵanstannyń soltústik-shyǵysyndaǵy negizinen tájikter turatyn Panjsher shatqalyna jialyp jatqany habarlanǵan.
Keiingi málimetterge qaraǵanda "Taliban" qozǵalysy jańa úkimet jariialamaǵan jáne Aýǵanstandy qalai basqaratyny jónindegi josparlaryn aitpaǵan. Baqylaýshylardyń sózinshe "Taliban" óziniń burynǵy radikaldy ustanymdarynan bas tartqanyna halyqaralyq qaýymdastyqty sendirgisi keledi. Alaida kei aimaqtarda qarsylastaryn qatań jazaǵa tartyp jatqany jaily aqparattar taraǵan.
