Sardoba sý qoimasyna júrgizilgen tehnikalyq aýdit aiaqtaldy, dep habarlaidy "Ult aqparat".
Bul týraly Ekologiia, geologiia jáne tabiǵi resýrstar ministriniń orynbasary Serik Qojaniiazov redaktsiianyń saýalyna joldaǵan jaýabynda aitty.
«Sardoba máselesi boiynsha Qazaqstan Respýblikasy men Ózbekstan Respýblikasy arasynda ministrler deńgeiinde tórt ret, (14 mamyr Shymkent, 2-3 shilde Tashkent) onyń ishinde eki ret onlain ekijaqty otyrysy ótkizildi. Ekologiia, geologiia jáne tabiǵi resýrstar ministri M.M.Myrzaǵalievpen Ózbekstan Respýblikasy Sý sharýashylyq ministri Sh.R. Hamraevtyń Shymkent qalasyndaǵy kezdesý kezinde (2020 jylǵy 14 mamyr) taraptar halyqaralyq sarapshylardy tarta otyryp, Sardoba sý qoimasyna tehnikalyq aýdit júrgizýge kelisti.
Alaida 2020 jyly Covid-19 pandemiiasyna bailanysty tehnikalyq aýdit júrgizý múmkin bolmady» delingen jaýapta.
Degenmen, bul jumys biyl aqpan aiynda atqaryldy.
Endi Ózbekstan taraby osy aýdit qorytyndysyn negizge alyp, sý qoimasyn qalpyna keltirý jobasynyń tehnikalyq-ekonomikalyq negizdemesin daiyndaidy.
Ol qujatty Qazaqstan taraby maquldaǵannan keiin ǵana iske asyrýǵa kirisedi.
«Aǵymdaǵy jyldyń 17-21 aqpan aralyǵynda Qazaqstan men Ózbekstan sarapshylary birlesip Sardoba sý qoimasyna tehnikalyq aýdit júrgizdi. Tehnikalyq aýdit qorytyndysy boiynsha taraptar aktige qol qoidy. Sardoba sý qoimasyn qalpyna keltirý boiynsha aldymen tehnikalyq-ekonomikalyq negizdeme ázirlenedi. TEN ázirlengennen keiin ózbek tarapy ony qazaqstan tarapymen kelisýge mindettenip otyr» deidi vitse ministr óz jaýabynda.
