Ózbekstan Prezidenti Tsifrlyq úkimet ofisimen tanysty. Qazaqstan tarapynan premer-ministr Asqar Mamin, Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, Saýda jáne integratsiia ministri Baqyt Sultanov boldy, dep habarlaidy Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmeti.
Baǵdat Mýsin Prezident Shavkat Mirziioev bastaǵan ózbekstandyq delegatsiiaǵa Tsifrlyq úkimet ofisiniń negizgi mindetteri men jobalary jaily aitty. Keńse qyzmetiniń aiasynda bastapqy analitika avtomattandyrylyp, boljamdar men damý barysy jasalyp, monitoring júrgizilip, maqsatty kórsetkishterge jetýge tosqaýyl bolatyn kedergiler anyqtalady jáne t.b.
Sondai-aq Baǵdat Mýsin «Tsifrlandyrý, ǵylym jáne innovatsiialar esebinen tehnologiialyq serpilis» ulttyq jobasynyń negizgi baǵyttaryna toqtaldy. Tsifrlyq memlekettik qyzmetter men biznes-úderisterdiń reinjiniringi týraly aityp, avtokólikti tirkeý/qaita tirkeý boiynsha jańa servisti mysalǵa keltirdi. Sonymen qatar halyqty vaktsinalaý barysy men qarqynyna tsifrlyq monitoring jasaý jobasyn tanystyrdy.
QR Saýda jáne integratsiia ministri Baqyt Sultanov onlain tártipte azyq-túlik baǵasyna monitoring pen boljam jasaýǵa múmkindik beretin Ishki jáne syrtqy saýda boiynsha analitikalyq platformany nazarǵa usyndy.
QR Qarjy vitse-ministri Marat Sultanǵaziev kontragentter arasyndaǵy mámilelerdi onlain tártipte qadaǵalaýǵa jol ashqan «Elektrondyq shot-faktýralar» júiesin tanystyrdy.
