Ózbekstan densaýlyq saqtaý ministrligi perzenthanadan jańa týǵan náresteni sán-saltanatpen shyǵarýǵa qarsy kúres júrgizip jatyr. Bul jóninde Ózbekstandaǵy jergilikti aqparat quraldary jazdy.
Eldiń densaýlyq saqtaý ministri Alisher Shadmanovtyń aitýynsha, balanyń densaýlyǵy men bolashaǵyna úiine qandai kólikpen kelgeni, qandai orkestr kútip alǵany nemese erteginiń qai keiipkeri qarsy alǵany mańyzdy emes.
Biliktiń bul tyiymynan keiin dárigerler, akýsher-ginekologtar júkti áielder men olardyń otbasylaryna jappai túsindirý jumystaryn júrgizip jatyr.
"Biz meditsinalyq kózqaraspen bul dańǵaza shara sábi men onyń anasynyń densaýlyǵyna keri áser etetinin túsindirýge tyrysamyz. Sábi týǵannan keiingi 40 kún - ana men balanyń densaýlyǵy úshin eń mańyzdy kezeń. Bul kezeńde bala men ananyń janynda týystarynyń bolmaǵany durys" deidi Alisher Shadmanov.
Buǵan deiin Ózbekstan prezidenti Shavkat Mirziiaev halyqty úilený toiǵa kóp aqsha shyǵyndamaýǵa shaqyrǵan. Al aqpanda resmi Tashkent elde túrik serialdaryn kórsetýge tyiym salǵan.
