Ózbekstan koronavirýs pandemiiasynyń saldarynan turalap qalǵan týrizm salasyn jandandyrýdyń amalyn qarastyryp jatyr. El prezidenti 19 maýsymda tiisti qaýlyǵa qol qoidy. Bul týraly «Ózbekstan 24» telearnasynyń arnaiy habarynda aityldy, dep habarlaidy "Ult aqparat".
«Sanitarlyq-epidemiologiialyq qaýipsizdik rejiminiń kúsheitilgen talaptaryn qatań saqtai otyryp, týrizm salasyn damytýdyń qosymsha sharalary týraly» dep atalatyn qaýly arqyly elde «Uzbekistan. Safe travel guaranteed» (Ózbekstan. Qaýipsiz saiahattaýǵa kepildik) júiesi engiziledi.
Osy júieniń aiasynda Qaýipsiz týrizm qory qurylýda. Oǵan Daǵdarysqa qarsy qordan 20 mlrd sým bólinedi, sondai-aq sertifikattaý jarnalaryna tólenetin tólemder arqyly qarjy quiylady.
Innovatsiialyq densaýlyq saqtaý ulttyq palatasynyń tóraǵasy Ravshan Izamov «Ózbekstan 24» arnasynyń tilshisine bergen suhbatynda jergilikti jáne sheteldik týrister Ózbekstanǵa saiahattaýdyń qaýipsiz ekenine senimdi bolýy kerek ekenin tilge tiek etti.
«Eger sheteldik týrist koronavirýstyq infektsiiany juqtyrsa, oǵan 3000 dollar ótemaqy tólenedi. Bul tájiribe álemniń kóptegen elderinde keńinen qoldanylady. Týroperatorlar karantin kezeńinde sheteldik týristerge tek «Uzbekistan. Safe travel guaranteed» júiesiniń tizilimine engizilgen nysandarda ǵana qyzmet kórsete alady», - dep habarlady «Ózbekstan 24» tilshisi arnaiy habarda.
