Shahmattan Ózbekstan erler quramasy Chennaida (Úndistan) ótken 44-shahmat olimpiadasynda jeńimpaz atandy. Al áielder arasyndaǵy básekede Qazaqstan quramasy 5-orynnan kórindi, dep habarlaidy Azattyq.
Ózbekstan erler quramasy 9 tamyzda ótken 11týrdaǵy sheshýshi oiynda Niderlandy quramasyn 2,5:1,5 esebimen jeńdi. Ózbekstan quramasy sapynda 20 jastaǵy Nodirbek Iakýbboev, 16 jastaǵy grossmeister Javohir Sindarov jáne 17 jastaǵy grossmeister Nodirbek Abdýsattorov jáne 27 jastaǵy Jahongir Vahidov oinady. Ózbekstan shahmat olimpiadasynda alǵash ret top jardy.
Qazaqstan erler quramasy shahmat olimpiadasynda 18-oryn aldy. Kúmisti Armeniia, qola júldeni Úndistannyń ekinshi quramasy ielendi.
Al áielder arasyndaǵy jarysta 5-oryn alǵan Qazaqstan áielder quramasy olimpiada kezinde 11 oiyn ótkizip, Gvatemala, Belgiia, Perý, Kýba, Vetnam, Slovakiia, Bolgariia, Úndistannyń ekinshi quramasyn jeńdi, Mońǵoliiamen teń túsip, Ázerbaijan jáne Úndistannyń birinshi quramasynan jeńildi.
Qazaqstan áielder quramasy sapynda olimpiadada rapidten álem chempiony Bibisara Asaýbaeva, grossmeister Jansaia Ábdýmálik, Kseniia Balabaeva, Gúlishan Nahbaeva, Nazerke Nurǵali oinady.
Channeidegi olimpiadada áielder arasynda Ýkraina chempion atansa, Grýziia kúmis, al AQSh qola medal ielendi.
