Memleket jáne qoǵam qairatkeri, tarihshy-etnolog ǵalym Ózbekáli Jánibekovke Almaty men Túrkistan qalasynda eskertkish ornatylady.
Bul jaiynda Senat depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Memleket jáne qoǵam qairatkeri, tarihshy-etnolog ǵalym Ózbekáli Jánibekovtyń 90 jyldyǵy Qazaqstan Respýblikasy Táýelsizdiginiń 30 jyldyǵy aiasynda atap ótiletin ataýly datalar men jyldar tizbesine engizilgen. Osyǵan bailanysty Úkimet qoǵam qairatkeriniń esimin qurmetteýge arnalǵan keshendi jumystar júrgizýde. Osy jyldyń tamyz-qyrkúiek ailarynda «Otyrar» memlekettik arheologiialyq qoryq-mýzeiinde «Ulttyq qundylyqtarymyzdy ulyqtaýshy – Ó. Jánibekov», «Otyrardyń taǵylymdy tulǵasy» atty kórmeler, «Ó.Jánibekov – ult mádenietiniń janashyry» taqyrybynda respýblikalyq ǵylymi-tájiribelik konferentsiia, «Áziret Sultan» memlekettik tarihi-mádeni mýzei-qoryǵynda «Ult rýhyn ulyqtaǵan – Ó.Jánibekov» atty dóńgelek ústel uiymdastyryldy», - delingen Úkimet basshysy orynbasarynyń jaýabynda.
Vitse-premerdiń atap ótýinshe, 19 qarashada Ońtústik Qazaqstan memlekettik pedagogikalyq ýniversitetinde Ó.Jánibekovtiń 90 jyldyǵyna arnalǵan «Táýelsizdik – máńgilik eldiń tuǵyry» atty halyqaralyq-tájiribelik konferentsiia jáne 8 jeltoqsanda «Babalar amanaty - Táýelsizdik» atty respýblikalyq jastar aitysy ótedi. M.Áýezov atyndaǵy Ońtústik Qazaqstan ýniversitetinde qarasha aiynda «Ult rýhyn ulyqtaǵan Ó. Jánibekov» atty dóńgelek ústel, sondai-aq kitap kórmesi uiymdastyrylady. «Miras» ýniversitetinde «Kórnekti etnograf jáne qoǵam qairatkeri Ó.Jánibekovtiń shyǵarmashylyq murasy» taqyrybynda ǵylymi-praktikalyq konferentsiia josparlanǵan.
«Ó.Jánibekovtiń qyzmeti men eńbegin nasihattaýǵa arnalǵan is-sharalar basqa óńirlerde de óz jalǵasyn tabady. Máselen, Almaty qalasynyń ákimdigi Almaty qalasy kitaphanalarynda qairatkerdiń 90 jyldyǵyna orai dóńgelek ústelder, kórmeler uiymdastyrady. Búginde qoǵam qairatkeriniń esimi Túrkistan qalasyndaǵy № 27 IT-mekteplitseiine, Túrkistan oblysynyń Otyrar aýdanyndaǵy № 4 mektep litsei internatyna berilgen. Atalǵan litsei-internatta Ó.Jánibekovtyń mýzeii jumys atqarýda. Túrkistan qalasyndaǵy kóshege Ó.Jánibekovtiń esimi 2004 jyly berilgen. Kósheniń uzyndyǵy 1 300 metr, 80-85 úi ornalasqan, sýmen, jaryqpen qamtamasyz etilgen, abattandyrylǵan, asfalttanǵan. Qazirgi kúni qala ákimdigi Túrkistan qalasyndaǵy jańadan túsken kóshelerdiń birine qoǵam qairatkeriniń esimin berý múmkindikterin qarastyrýda. Sonymen qatar Shymkent qalasynda Ó. Jánibekovtiń esimi berilgen 1 mektep jáne qala aýmaǵynda 1 úlken kóshe bar. Ó. Jánibekovtiń biýsti Túrkistan qalasynda qairatkerdiń esimimen atalatyn mektep aldynda, al eskertkishi Otyrar aýdany Sháýildir aýylynda ornatylǵan. Qazirgi ýaqytta Túrkistan oblysy ákimdigi memleket qairatkerine arnalǵan eńseli eskertkishti Túrkistan qalasynda ornatý máselesin kelesi jyly Monýmenttik óner qurylystaryn ornatý jónindegi komissiianyń qaraýyna usynýdy josparlaýda», - dedi Eraly Toǵjanov.
Onyń atap ótýinshe, búgingi kúni Almaty qalasyndaǵy Gogol kóshesiniń 37 meken-jaiyna Ó. Jánibekovke memorialdyq taqta ornatý jumystary júrgizilýde. Almaty qalasynyń ákimdigi memleket qairatkerine arnalǵan eskertkish ornatý máselesin qalalyq Tarih jáne mádeniet eskertkishterin qorǵaý jónindegi komissiianyń kezekti otyrysynyń qaraýyna engizetin bolady. Aqparat jáne qoǵamdyq damý ministrligi 2022 jylǵy memlekettik tapsyrys aiasynda «Qazaqstan» RTRK» AQ Ó.Jánibekov jáne K.Smaiylov týraly, «Habar» agenttigi» AQ Sh.Murtaza, Sh.Ýálihanov týraly portrettik derekti filmder daiyndaý úshin taqyryptyq tizimge qosýdy josparlap otyr.
«Sondai-aq, qazirgi kezde Mádeniet jáne sport ministrligi Túrkistan oblysy ákimdigimen birlese otyryp, «Otyrar» memlekettik arheologiialyq qoryq-mýzeiine qarasty Arystanbab kesenesiniń aýmaǵynda ornalasqan Ó.Jánibekov kesenesin respýblikalyq mańyzy bar tarih jáne mádeniet eskertkishteriniń memlekettik tizimine engizý máselesin qarastyrýda. Qostanai oblysynyń ákimdigi Arqalyqtaǵy «Dala ólkesi tarihi oblystyq mýzeiine» Ó.Jánibektiń esimin berý boiynsha qoǵam pikirine zerdeleý júrgizip, tiisti qujattardy ázirleitin bolady. Elimizdiń Táýelsizdiginiń 30 jyldyǵymen tuspa-tus kelgen kórnekti tulǵa Ózbekáli Jánibekovtiń 90 jyldyǵyn uiymdastyrý odan ári tiisti deńgeide jalǵastyrylatyn bolady», - dedi vitse-premer.
