"Ózbegim-óz aǵam" deidi qazaq. Ózbekstanda kóptegen problemalar kún tártibinde tur:
Birinshi, valiýtalyq kollaps. Ózbektiń tól aqshasy qur qaǵaz bolyp ketti, al dollar - shyrqady. Ózbekstan shet elderden ozyq tehnologiialar satyp ala almaidy, qymbat. Kapital qashyp jatyr. Bai ózbekterdiń birazy Batys elderine Kárimov otbasynyń ozbyrlyǵynan qashsa, endi Kárimovke jaqyn adamdar da Mirziiaevtyń ministrleri men ákimderinen qashpaq jáne qashyp jatyr. Ózbek qazynasynda tiisti rezerv joqtyń qasy.
Ekinshi, qol eńbegi tym arzan, qol eńbeginiń arzandyǵy jańa tehnologiialarǵa bóget. Ózbekstanda mólsheri 33 million adam turady. Halyqtyń tym tez ósýi Ózbekstan úshin qasiret. Halyqtyń tym tez ósýi ekonomikalyq jáne áleýmettik taýqymetterge ákeldi. Olarǵa Úkimet ne jumys, ne sapaly oqý, ne meditsinalyq kómek kórsete almai keledi.
Úshinshi, shikizat baǵasy tym arzandady. Maqta, gaz ben ýran baǵasy tómendep ketti. Qyshlaqtarda jer jetispeidi, ásirese sýarmaly.
Tórtinshi, naryqtyq reformalar tiis deńgeide júrgen joq. Naryqtyq institýttary tiisti deńgeide istemeidi, qurylymdyq disproportsiialar kúshti. Shirkat ujymdary tiisti pármen bermei keledi.
Besinshi, búkil Ózbekstan qyshlaqtyq aglomeratsiiaǵa ainaldy. Úi turǵyzatyn jer joq, qalaǵa qonystanýǵa kirgizbeidi - qatań propiska júiesi. Al Ózbekstannyń qalalary qyshlaqtarǵa ainalyp bara jatqan siiaqty.
Altynshy, 5 milliondai erkek ózbek Reseide, taǵy 300 myńdaiy Qazaqstanda jalshylyqta júr. Erkek kindik jetispeidi: psihologiialyq - jynystyq disproportsiia kúsheidi. Ózbek qyshlaǵynda eresek deni saý erkek kindik qalǵan joq. Bul jaǵdai 1941-1945 jyldardaǵy soǵystan keiingi jaǵdaidy kózge elestetedi.
Jetinshi, Ózbekstannyń qazaǵy Qazaqstanǵa qarqyndy kelip jatyr. Kelem deýshilerge arnaiy baǵdarlama kerek. Qazaqtardyń birazy ózbek pen qaraqalpaq bolyp ákimshilik jolmen jazylyp ketken. Olardy da qazaqtyqqa qaitaryp qujatyn jóndeýge mursat berý kerek. Ondai baǵdarlamalarǵa qarjy kerek. Ózbekstannyń orysy men koreii Reseige ketip jatyr.
Ózbek halqy tózimdi jáne baisaldy ult. Endi Mirziiaev reforma jasaimyn deidi. Biraq aldymen ekonomikalyq reformany, keiin saiasi reformany jasaý kerek. Jańa bilik igi ózgerister jasaimyz dep ýáde berýde. Bul ýádeler ár ózbektiń júregine úmit otyn jandyrdy.
Ázimbai Ǵali
