Búgin Nur-Sultan qalasynda Qazaqstan Respýblikasy Mádeniet jáne sport ministrligi Til saiasaty komiteti Shaisultan Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynyń uiymdastyrýymen Oqytýshylar arasyndaǵy Ahmet Baitursynuly atyndaǵy respýblikalyq baiqaýy ótti.
Basty maqsat - Ahmet Baitursynulynyń ǵylymi-pedagogikalyq muralarynynyń sabaqtastyǵyn jalǵastyrý. Uly tulǵanyń ádistemelik ideialaryn, qazaq tiliniń memlekettik til retindegi mártebesin ulyqtaý men qoldanylý aiasyn keńeitýdegi oqytyýshylar isin dáripteý.
Ult tili – qazaq tili janashyrlarynyń eń úzdigin tańdaý arqyly oqytýdyń jańashyl ádis-tásilderin taratýǵa negiz bolary sózsiz.
Ashylý saltanatynda Shaisultan Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynyń bas direktory Álibek Asqar «Bul baiqaýdan kútip otyrǵan nátijemiz, qazaq tilin oqytýdyń innovatsiialyq ádis-tásilderin anyqtaý jáne taratý, oqytýshylardyń kásibi biliktiligin arttyrý jáne ózara tájiribe almasýy, eresekterge qazaq tilinen sabaq berýdiń sapasyn arttyrý» - dep oiyn túiindedi.
Sondai-aq Qazaqstan Respýblikasy Parlamenti Májilis depýtaty Abai Tasbolatov, Parlamentiniń Senat depýtaty Nurtóre Júsip baiqaý qatynasýshylaryna sáttilik tiledi.
Baiqaý tórine birinshi bolyp Aqtóbelik Altyngúl Táńirbergenova, Qyzylordalyq Ásel Baqytova, Nur-Sultandyq Erkebulan Erbolatuly, Pavlodarlyq Qazyna Qadas, Qaraǵandylyq Mýnira Aǵymbaeva, Batys Qazaqstandyq Indira Baimoldina, Atyraýlyq Áigerim Qoitanovalar kóterilip ózderiniń elektrondyq portfoliony tanystyrý jáne pedagogikalyq-psihologiialyq jaǵdaiattarǵa arnalǵan tapsyrmalary men ozyq sabaq úlgilerin kórsetip, ádis-tásilderin kórermen nazaryna usyndy.
Al filologiia ǵylymynyń doktory, professor, QR UǴA korrespondent múshesi Sherýbai Qurmanbaiuly bastaǵan ádil qazylar alqasy jeńimpazdar men júldegerlerdi anyqtady.
Bas júldeni Rýdnyi qalasy “Qalalyq tilderdi oqytý ortalyǵynyń” oqytýshysy Janat Dosýbaeva ielendi. Al birinshi júlde Nur-Sultan qalasy Rýhaniiat ortalyǵy Ideologiialyq jumystary jáne jobalardy júzege asyrý bóliminiń basshysy Erkebulan Erbolatuly, ekinshi Qaraǵandy oblysynyń Tilderdi oqytý ortalyǵynyń oqytýshysy Mýnira Aǵymbaeva, úshinshi Shyǵys Qazaqstan oblysy Tilderdi oqytý ortalyǵynyń oqytýshysy Ásem Mamyranova ielendi. Sondai-aq yntalandyrý syilyǵyn Qyzylorda oblysy Tilderdi oqytý ortalyǵy Oqý-ádistemelik bólimniń basshysy Ásel Baqytova, Jambyl oblysy Tilderdi oqytý ortalyǵynyń oqytýshysy Aqmaral Tursynbekova, Shymkent qalasy Tilderdi oqytý ortalyǵynyń oqytýshysy Aisulý Ospanovalarǵa buiyrdy. Barlyq baiqaýǵa qatysýshylarǵa syi-sipat jasaldy.
Endigi mindet – ulttyq pedagogikamyzdyń tarihi, mádeni ári rýhani aspektilerin jáne bilim berýdiń zamanaýi jetistikterin ushtastyra otyryp, elimizdiń bilim berý salasyn damytýǵa úles qosý. Osy oraida, respýblika kóleminde oqytýshylardyń kásibi biliktiligin artyrýdy ult ziialylarynyń pedagogikalyq tájirbiesine negizdep júrgizý kezek kúttirmes is.
