Túlkibastyqtar «Altyn kúz» merekesin shat kóńilde qarsy aldy. Aýa raiy da janǵa jaily bolyp turǵan bul kúni turǵyndar bazar naryǵynan arzan baǵada aýyl sharýashylyǵy ónimderin satyp aldy. Aýdan ákimi Nurbol Turashbekov yrzyǵyn jerden tapqan sharýalarǵa, aýyl sharýashylyǵynyń ósip-órkendeýine, kásipkerliktiń damýyna úles qosqan aýyl ákimderi men sala qyzmetkerlerine rizashylyǵyn bildire otyryp, Alǵys hat, tósbelgi men baǵaly syilyqtar tapsyrdy.
Iá, bul kúni jer emgen sharýalardyń mańdai terleri aqtalyp, mereileri ósti. Jyl basynan beri Túlkibas aýdanynda quny 25 mlrd. teńgeniń ónimi óndirilgen. Bul biylǵy jyldyń tiisti kezeńimen salystyrǵanda 5 mlrd. teńgege artyq. Sonymen birge 24 myń tonna alma óndirilipti. «Aýyl sharýashylyǵyn qarjylai qoldaý qory» arqyly quny 237 mln. teńge bolatyn 71 joba qarjylandyrylyp, aýdannyń agrosalasyn damytýǵa jumsalǵan. Al, «Yrys» mikroqarjy uiymynan 55 azamat 218 mln. teńge kóleminde shaǵyn nesie alǵan. Osynyń arqasynda 31 óndiristik kooperativ qurylyp, 385 adam turaqty jumyspen qamtylyp otyr.
Sondai-aq, sýarmaly jer kólemin arttyrý úshin uzyndyǵy 572 shaqyrym kanal memleket menshigine qaitarylǵany atap óterlik jetistik. Bul jańalyqtyń keleshekte ónim kólemin arttyrýǵa septigin tigizetini anyq. Merekelik saltanatta «Birlik» ÓK tóraǵasy Q.Jabataev, «Maqulbek» JShS direktory E.Sartbaev, «Ermek» bazarynyń direktory Q.Batyrbekov, aýyl sharýashylyǵyn damytýǵa qosqan úlesi úshin Jaskeshý aýyldyq okrýginiń ákimi S.Ókebaiuly jáne basqa da azamattar arnaiy tósbelgimen marapattalyp, baǵaly syilyqqa ie boldy. Marapattalǵandardyń ishinde alma baýy kólemin 240 gektarǵa jetkizip, 5500 tonna alma óndirip, saqtaǵan «Kóktal» ShQ tóraǵasy, jas baǵban B.Tóleshev, Mailykent aýyldyq okrýginiń ákimi K.Jartybaev jáne usaq sharýashylyqtardy biriktirip, aýyl sharýashylyǵy óndiristik kooperativin qurǵan H.Baiysbaev, B.Ýmishov, aýdannyń áleýmettik-ekonomikalyq damýyna úles qosqan E.Ospanov, Á.Mámbetaliev jáne ózge de kásipkerler bar.
Úzdik aýyl sharýashylyǵy mamandarynyń, ozat eńbekkerlerdiń esimderi qurmetpen atalyp, aýyl sharýashylyǵynyń órkendeýine atsalysqan birqatar azamattar «Eńbek dańqy» tósbelgisimen marapattaldy.
«Altyn kúz» jármeńkesi barysynda alańqaida ásem án áýelep, myń buralǵan biler bilenip, marqaiǵan kóńilderge shýaq quidy.
Aigúl SÚNDETOVA, «Ońtústik Qazaqstan».
Túlkibas aýdany
