Foto: Akorda.kz
Memleket basshysy Qasym-Jomart Toqaev Soltústik Qazaqstan oblysyna sapary aiasynda «Qyzyljar-Sút» fermasynyń jumysymen tanysty.
Prezidentke sút fermasyndaǵy saýyn tsehy jáne mal bordaqylaý alańy kórsetilip, osy keshende qoldanylatyn sút óndirý tehnologiiasy tanystyryldy.
Taýarlyq sút fermasynyń birinshi kezeńi 2020 jyly iske qosylǵan. Byltyr kásiporynǵa 366 million teńge investitsiialyq sýbsidiia bólingen jáne Germaniiadan simmental jáne golshtin asyl tuqymdy iri qara satyp ákelingen. Ferma 60 jergilikti turǵyndy turaqty jumyspen qamtamasyz etip otyr.
Prezident Soltústik Qazaqstan óńirinde mal sharýashylyǵy ónimderiniń óndiris kólemin arttyrýǵa mol múmkindik bar ekenin atap ótti.
– Biz mundai óndiristik jobalarǵa mindetti túrde qoldaý kórsetemiz. Áleýmettik-kásipkerlik korporatsiialar arqyly jeńildikpen kredit berý óz tiimdiligin kórsetti. Iaǵni, qarjylandyrý jaǵynan másele bolmaýǵa tiis. Sút óndirisin tiisti deńgeide uiymdastyrý kerek. Búkil el boiynsha óz-ózimizdi sút ónimderimen qamtamasyz etetin deńgeige jetýimiz kerek, – dedi Memleket basshysy.
Oblysy ákiminiń orynbasary Marat Tasmaǵambetovtyń aitýynsha, qazirgi tańda aimaqta jyl saiyn 650 myń tonnadan astam sút óndiriledi. Bul – respýblika boiynsha óndiriletin sút kóleminiń 10 paiyzy. Sońǵy bes jylda oblysta 16,5 myń bas iri qaraǵa eseptelgen 30 sút fermasy ashyldy. Biyldan bastap taǵy da 17 taýarlyq sút fermasyn ashý úshin qosymsha 54,9 mlrd teńge bólinedi.
Jalpy, oblysta agroónerkásip salasyndaǵy jobalardy júzege asyrý úshin jeńildikpen kredit berý mehanizmi iske qosylǵan. Óńirdi keshendi damytý baǵdarlamasy aiasynda «Soltústik» áleýmettik-kásipkerlik korporatsiiasy arqyly jalpy quny 35 milliard teńgege 35 joba qarjylandyryldy. Atap aitqanda, memleket qoldaýymen 21 sút fermasy jáne 2 qus fabrikasy ashyldy. Taǵy bir qus fabrikasy aldaǵy ýaqytta paidalanýǵa beriledi. Et ónimderin shyǵarýǵa mamandanǵan «EMC-Agro» JShS keshenindegi mal sany 200 myń basqa deiin kóbeiip, qosymsha 180 jumys orny ashylmaq. Sonymen qatar mai syǵatyn zaýyt, jylyjai, sýarmaly egistik, asyl tuqymdy qoi sharýashylyǵy sekildi birneshe baǵytta túrli joba júzege asyryla bastady.
Prezident agroónerkásip kesheni basshylarymen jáne qarapaiym jumysshylarmen áńgimelesti. Olar memleket tarapynan jan-jaqty qoldaýdyń nátijesinde Soltústik Qazaqstan oblysynda mal sharýashylyǵynyń damýy tyń qarqyn alǵanyn atap ótti.
Memleket basshysy adal eńbegimen eldi kórkeitýge, halyqty azyq-túlikpen qamtamasyz etýge qosqan úlesi úshin aýyl eńbekkerlerine alǵys aitty.
Sonymen qatar Prezident oblys basshylyǵyna jańa fermalardy iske qosý jáne qoldanystaǵy sharýashylyqtardyń óndiristik qýatyn arttyrý arqyly sút óndirisi baǵytyndaǵy mal sharýashylyǵyn odan ári damytý jóninde tapsyrma berdi.
