QR Premer-Ministriniń birinshi orynbasary Eraly Toǵjanov oiyn-saýyq ortalyqtarynyń qashan ashylatynyn túsindirdi, dep habarlaidy QazAqparat.
«Búgin Prezident Qasym-Jomart Toqaev 2 myń sharshy metrge deiingi azyq-túlikten bólek dúkenderdiń, sulýlyq salondarynyń jáne balalardy damytý ortalyqtarynyń ashylatynyn málimdedi. Turǵyndardyń saiabaqtar men skverlerde serýendeýine ruqsat beriledi. Park janyndaǵy kóńil kóterý jumystaryna shekteý qoiylady», - dep túsindirdi E. Toǵjanov Úkimette ótken onlain brifingte.
Sonymen birge, E. Toǵjanov oiyn-saýyq ortalyqtarynyń jumysyn jandandyrý boiynsha kóp suraq kelip túskenin aitty.
«Bul kezeńde oiyn-saýyq ortalyqtarynyń, meiramhanalar men qonaq úilerdiń jumysy iske qosylmaitynyn málimdeimin. Bul másele sál keiinirek óńirlerdegi sanitarlyq-epidemiologiialyq jaǵdaidy eskere otyryp, qarastyrylady», - dedi E. Toǵjanov.
Onyń aitýynsha, eldegi KVI juqtyrǵandar úlesin 2 paiyzǵa deiin azaitqanda ǵana, oiyn-saýyq ortalyqtaryn ashýǵa múmkindik bar.
