Almaty qalasynda ótken Shyǵys Qazaqstan oblysynyń kúnderinde óńiraralyq áriptestiktiń aiasynda aimaqtyń 23 kásiporny óz ónimderiniń tusaýkeserin ótkizdi. Eki óńirdiń kásipkerleri ózara bailanys jónindegi otyzdan asa kelisimge qol qoidy. Sonymen birge almatylyqtarǵa arnalyp bal jármeńkesi, arheologiialyq qazbalar kórmesi uiymdastyrylsa, shyǵysqazaqstandyq ónerpazdar mazmundy kontserttik baǵdarlama usyndy.
Altaidyń balyn sheteldikter de satyp aldy
Mundaǵy ótken sharalarǵa oblys ákimi Danial AHMETOV pen Almaty qalasynyń ákimi Baýyrjan BAIBEK qatysty. Atap aitarlyǵy, Shyǵys Qazaqstan Elbasynyń tapsyrmasy boiynsha óńirler arasyndaǵy tyǵyz áriptestikti ornatýdy elimizdiń segiz oblysy ishinde birinshi bolyp qolǵa alyp otyr.
Oblystyń kúnderi Ulttyq Ǵylym akademiiasynyń aldyndaǵy alańda almatylyqtarǵa arnalǵan bal jármeńkesinen bastaý aldy. Bul jóninde aldyn ala qulaqtanǵan qala turǵyndary ertemen jinalyp, dámi til úiirgen alýan túrli sapaly baldy tatyp kórýge de, kóptep satyp alýǵa da múmkindik aldy. Olarǵa arnap Óskemen qalasynan jáne oblystyń toǵyz aýdanynan qatysqan taýar óndirýshiler barlyq túri qamtylǵan 40 tonnadan astam baldy jáne otyzǵa tarta panty ónimderin usyndy.
– Biylǵy maýsym aiynda ózara áriptestik bailanystardy ornatý úshin almatylyq delegatsiia Shyǵysta bolyp qaitqan edi. Nátijesinde búgingi jármeńkege Zyrian, Glýbokoe, Katonqaraǵai, Ulan, Úrjar, Aiagóz, Shemonaiha, Kókpekti, Tarbaǵatai aýdandarynyń omartashylary qatysyp, sapaly óz ónimderin usynyp otyr. Oryn saýda jasaýǵa óte yńǵaily. Biyl segiz aida Almaty bazarlarynda satylǵan ónim kólemi bir jylǵy mejeden de artyq bolyp otyr, - dedi oblys ákiminiń orynbasary Dúisenǵazy Mýsin.
Máselen, Glýbokoe aýdany ádemi bezendirilgen segiz shatyrda 14 tonna baldy satylymǵa shyǵarsa, Tereshenko, Konstantin Sevastianov, Denis Chashin, Skýratovtar otbasylyq omartalarynyń ókilderi óz ónimderiniń basym denin saýdalap úlgerdi.
– Biz osy jármeńke týraly estip, úlken qyzyǵýshylyqpen arnaiy kelip, qatysyp jatyrmyz, - deidi Germaniiadan qonaqqa kelgen meiman Jaklin Graf. – Germaniiada osynaý baǵaly ónim tek tátti azyq qana emes, sonymen birge, taptyrmas sapaly emdik dári bolyp ta sanalady. Sondyqtan Almatyǵa qydyryp kelgen dostarymdy da bal satyp alýǵa ózimmen birge ertip keldim. Aldaǵy ýaqytta osyndai tamasha bal óndiretin Shyǵys Qazaqstandy da kórip qaitýdy josparlaityn bolamyz. Onyń sózin qasyndaǵy joldastary Haike Failer men Depler Fitsen de biraýyzdan maquldady. Sondai-aq, bal jármeńkesine qatysqan ózge de sheteldik azamattardyń qarasy kóp bolǵanyn ataǵan oryndy.
Tarihi qazbalardy tamashalaýshylar kóp boldy
Bal jármeńkesiniń shyraiyn óńirdiń qolóner sheberleriniń qolynan shyqqan ártúrli qolóner buiymdary men kúndelikti turmysqa qajetti zattary da asha tússe, olar da joǵary suranyspen satyldy.
Almatylyqtar budan basqa Shyǵys Qazaqstannyń mádeni ujymdary usynǵan merekelik kontsertti tamashalap, sonymen birge, 2016 jyldyń kóleminde oblys aýmaǵynan tabylǵan Saq dáýirindegi arheologiialyq qazbalardy da kórýge múmkindik aldy.
Oblys ákiminiń tikelei bastamasymen júrgizilgen ǵylymi jumystar týraly, Berel qorǵanynda, Shilikti jazyǵynda, ortaǵasyrlyq Ablaikit qorǵan-monastrinde, Qyryqúńgir men Eleke sazynda tabylǵan baǵa jetpes qundylyqtar týrasynda qala turǵyndaryna Ál-Farabi atyndaǵy KazMÝ professory, belgili arheolog-ǵalym Ábdesh Tóleýbaev áńgimelep berdi. Onyń aitýynsha, Shilikti jazyǵynan tabylǵan qazbalar kóshpendi skif-saq mádenietiniń dál osy Altaidan bastaý alatyndyǵyn dáleldeidi. Bul shyndyǵynda da sensatsiialyq jańalyq ekeni daýsyz.
Ulttyq Ǵylym akademiiasynyń aldynda uiymdastyrylǵan atalǵan sharalardy Almaty qalasynda turatyn elge belgili jerlesterimiz de aralap kórgenin, kásibi túrde joǵary baǵa bergenin aita keteiik. Olardyń ishinde aqyn, Memlekettik syilyqtyń iegeri, «Juldyz» jýrnalynyń bas redaktory Ulyqbek Esdáýlet, Qazaqstan Sýretshiler Odaǵynyń múshesi, Á.Qasteev atyndaǵy murajai direktory Erkin Nurazhan jáne Qurmanǵazy atyndaǵy konservatoriiada oqyp jatqan bir top jerles stýdentter bar.
Oblystyń 19 kásiporny Almatyǵa azyq-túlik jetkizedi
Bal jármeńkesi qyzyp jatqan tusta qalanyń Ál-Farabi dańǵylynyń boiynda oryn tepken eń iri biznes-ortalyqtarynyń biri «Ritz Carlton Almaty» qonaqúiinde Shyǵys Qazaqstan oblysynyń jáne Almaty qalasy ákimderiniń qatysýymen eki óńir investorlary men kásipkerleriniń kezdesýi ótti.
– Elbasymyz Nursultan NAZARBAEV óńiraralyq kooperatsiianyń mańyzdylyǵyn únemi eske salyp keledi, - dedi Almaty ákimi Baýyrjan BAIBEK. – Shyǵys Qazaqstan eldegi segiz óńirdiń arasynda alǵashqy bolyp Almatyǵa kelip, ózara áriptestikti nyǵaitýda aýqymdy sharýalardy tyndyryp otyr. Bul rette oblys basshysy Danial AHMETOVTIŃ úlken eńbegi bar ekenin atap aitqym keledi. Nátijesinde qaladaǵy iri saýda jelilerine aýylsharýashylyq ónimderin tikelei tasymaldaý maqsatynda 30-dan astam kelisimshartqa qol qoiylyp otyr.
Sondai-aq, Almaty ákimi halqy jyl sanap artyp kele jatqan iri megapolisti qajetti azyq-túlikpen qamtamasyz etý ózekti ekendigin, bul saladaǵy kásipkerlikti damytýǵa barlyq jaǵdailar jasalatynyn, bul rette Shyǵys Qazaqstanmen bailanystyń áleýeti asa joǵary ekendigin, Shyǵystan jetkiziletin taýarlar kólemi biyl on paiyzǵa artyp 32 myń tonnany quraǵanyn, oblystyń 19 kásiporny Almatyny óz ónimderimen qamtyp otyrǵanyn jetkizdi. Jiyn barysynda Almaty men Shyǵys Qazaqstannyń ekonomikalyq bailanystary barlyq salany qamti alatyny da erekshe atalyp ótildi.
Óz kezeginde oblys ákimi Danial AHMETOV Shyǵys Qazaqstannyń investitsiialyq áleýetin tanystyryp, biznesti qoldaýdyń sharalary jóninde keńinen málim etti.
– Shyǵysqazaqstandyq taýar óndirýshilerdiń múmkindikteri men resýrstary óńiraralyq qoǵamdastyqtyń utymdy úlgilerin paidalana otyryp, elimizdegi ózge oblystardyń naryǵyna shyǵýǵa jaǵdai týǵyzady. Bul baǵytta, árine, Almaty qalasynyń orny erekshe. Bizdegi mal sharýashylyǵy salasynyń áleýeti zor. Taiaýdaǵy 10-15 jylda Shyǵys Qazaqstannyń agrarlyq sektory investitsiia salýǵa asa qolaily bolatyny sózsiz. Ózimizde aýylsharýashylyq ónimderi molynan óndirilip jatqanda, ony shetelden qymbat baǵaǵa tasýdyń qajeti qansha. Tipti, bizdiń ónimder sapasy jaǵynan sheteldikinen asyp túspese, kem túspesi anyq. Ári kásipkerlerimizge de úlken qoldaý. Biz sizderge shamamen 90 paiyz sýarmaly jerlerdi usyna alamyz. Úrjar aýdanynda jylyna 30 myń tonna qus etin óndiretin jáne Ulan aýdanynda jylyna 100 mln. dana jumyrtqa óndire alatyn qus fabrikalary jobalaryn birlese júzege asyrýǵa bolatynyn aitqym keledi. Sol siiaqty investorlardy týristik klaster qurýǵa shaqyramyz, – dedi oblys ákimi Danial AHMETOV.
Budan ary qarai kezdesýde aǵash óńdeý ónerkásibin, sýarmaly alqaptardy damytýdaǵy, birlesken týristik nysandar salýdaǵy ortaq jobalar tilge tiek etilip, eki jaqtyń kásipkerleri «suraq-jaýap» formatynda ózderine qajetti aqparattarmen qanyqty. Al oblys ákimi barlyq almatylyq kásipkerlerdi alda qazannyń 21-22 kúnderi Óskemende ótetin «Altai Invest - 2016» halyqaralyq investitsiialyq forýmyna qatysýǵa shaqyryp, onda 84 joba usynylatynyn atady.
Munan keiin Shyǵys Qazaqstandyq delegatsiia Almaty qalasynyń basshylyǵymen birge ońtústik astanadaǵy saýda oryndarynyń biri «Magnum Cash&Carry» gipermarketinde bolyp, jumysymen tanysty.
Atalǵan gipermarketke Shyǵys Qazaqstannyń ónimderi turaqty túrde jetkizilip turady. Almatylyqtar oblys kásipkerleri óndiretin sapaly sút jáne sút ónimderin, konservilerdi, jartylai fabrikattardy, et ónimderiniń, qus etiniń alýan túrin, kúnbaǵys maiyn, undy, konditerlik ónimderdi belsendi túrde satyp alýda.
Dáýren Allabergenuly
Sýretterdi túsirgen - Ǵylymbek Sábitov.
"Didar" gazeti
