«Aitystyń aqbereni» atanǵan aitysker aqyn Táýshen Ábýovanyń týǵanyna 90 jyl tolýyna orai Otyrar aýdany ákimdiginiń uiymdastyrýymen «Jyryńdy seniń saǵyndym, Táýshen apa!» atty respýblikalyq aqyndar aitysy ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Aldymen kelgen qonaqtar Táýshen aqynnyń ómiri men shyǵarmashylyǵynan syr shertetin kórmeni tamashalady. Munan soń jyr dodasyn Otyrar aýdanynyń əkimi Sáken Sultanhanov pen birneshe respýblikalyq jáne halyqaralyq aitystardyń jeńimpaz-júldegeri, aqyn, sazger Ábdihalyq Ábdiraiymov quttyqtaý sózben ashyp berdi. Aqyndar aitysyn elimizge belgili aqyn, halyqaralyq aitys aqyndary men jyrshy-termeshiler odaǵynyń múshesi, birneshe án men termelerdiń, «Qazyqjurt» jyr jinaǵynyń avtory Bekmurat Anarbaev kieli Otyrar halqyna arnaǵan áserli óleń shýmaqtarymen ashyp, júrgizip otyrdy.
Alaman aitysqa «Aitystyń arystany» atanǵan, Bekarys Shoibekov, respýblikalyq «Altyn dombyra» aqyndar aitysynyń úsh dúrkin jeńimpazy Muhtar Niiazov pen Jansaia Mýsina, Aibek Qaliev, Birjan Baitýov, Aitbai Jumaǵulov, Nurzat Qarý, Dáýren Aqsaqalov syndy sýyryp salma aityskerler qatysyp, kórermenge erekshe aitys syilady. Qara dombyra kúmbiri, aqyndyqtyń shabytty syry tunǵan aitysta Təýshen Əbýovanyń asqaq abyroily, sóz tamyrly məńgilik izi men úlgi-ónegesi, qasietti Otyrar aýdanynyń tarihi orny men búgingi jetistigi aqyndardyń óleńderine arqaý boldy.
Qazylar alqasynyń sheshimimen Aitbai Jumaǵulov «Qyzyl jyraý» atanyp ketken Myrzabek Baijanuly atyndaǵy, Aibek Qaliev otty aqyn Qanybek Sarybaev atyndaǵy jáne Nurzat Qarý halyq aqyn Áselhan Qalybekova atyndaǵy syilyqtyń iegerleri atandy. Al úshinshi orynǵa qyzylordalyq Muhtar Niiazov pen shymkenttik Birjan Baitýov laiyqty dep tanylsa, otyrarlyq jas aqyn Dáýren Aqsaqalov ekinshi oryn, batys qazaqstandyq Jansaia Mýsina birinshi oryn iegeri atanyp, kóptiń qoshemetine bólendi. Sondai-aq «Jyryńdy seniń saǵyndym, Táýshen apa!» atty respýblikalyq aqyndar aitysynyń bas júldesi Bekarys Shoibekovke buiyrdy. Aqberen aqyndy eske alý aitysynyń jeńimpazdary qomaqty syilyqtarǵa ie boldy.
Aita keteiik, dúbirli doda maqsaty – aitys óneri arqyly elimizdiń táýelsizdik jyldaryndaǵy jetistigin jyrǵa arqaý etý, qazaq halqynyń salt-dástúri men ádet-ǵurpyn keńinen nasihattaý jáne Táýshen Ábýovanyń aitys álemindegi shoqtyǵy biik ónerin dáripteý.
