2020 jyly elimizde qoi sany bir jylda 837 myńǵa ósti. Bul týraly Jazylbek Qýanyshbaevtyń 125 jyldyǵyna arnalǵan «Qazaqstannyń qoi sharýashylyǵy: ótkeni, búgini jáne keleshegi» taqyrybyndaǵy konferentsiiada QR Aýyl sharýashylyǵy ministri Saparhan Omarov aitty, dep habarlaidy QazAqparat.
«2020 jyldyń qorytyndylary boiynsha úilesimdi jumys pen ýaqtyly qabyldanǵan sharalardyń arqasynda agroónerkásiptik keshen salasynda is júzinde barlyq makrokórsetkishter boiynsha oń ósý serpini baiqalady. 2020 jyly qoi sharýashylyǵyn damytý maqsatynda memlekettik biýdjetten 16 mlrd teńge qarajat bólindi. Bul 2019 jyldyń deńgeiimen salystyrǵanda memlekettik qoldaý kóleminiń 35 paiyzǵa artqanyn kórsetedi. Nátijesinde 2020 jyly qoi sany 17,7 mln basqa jetip, onyń ishinde kásiporyndar men fermer qojalyqtarynda 8,4 mln bas, jurtshylyq sharýashylyqtarynda 9,2 mln basty qurap otyr. 2020 jyl boiynsha jyldyq qoi basynyń eń joǵarǵy ósimi tirkeldi. Iaǵni 1 jylda 837 myń basqa ósti», - dedi ministr.
Onyń atap ótýinshe, asyl tuqymdy qoidyń úlesi 16,1 paiyzǵa nemese 2,8 mln basqa jetti. 300 myń bas asyl tuqymdy qoi satyldy. Al bul óz kezeginde selektsiialyq jumystyń damýyna úlesin tigizip otyr.
«Jalpy agroónerkásiptik keshenin, sonyń ishinde qoi sharýashylyǵyn damytýda memlekettik qoldaýdyń tetikteri retinde jeke toqtala ketetin másele, ol - ǵylymmen qamtamasyz etý. Bul qoldaý memleket tarapynan ǵylymi jumystardy baǵdarlamalyq-nysanaly qarjylandyrý arqyly júzege asyrylady. Sońǵy 3 jyl aralyǵynda Qazaq mal sharýashylyǵy jáne azyqtandyrý ǵylymi-zertteý institýty júrgizgen ǵylymi jumystar nátijesinde qoi sharýashylyǵynda respýblikanyń ár óńirinde 20 modeldik ferma qurylyp, olar zamanaýi tehnikalarmen jabdyqtalyp, qoi ósirý men jaiylymdardy qoldanýda jańa innovatsiialyq tehnologiialardy paidalanyp, fermerler men stýdentterdi oqytý bazasy rolderin atqaryp otyr. Bul is-sharalarǵa biýdjetten 735,6 mln teńge berildi», - dedi Saparhan Omarov.
Sonymen qatar minitr ǵylymi qamtamasyz etý nátijesinde qoi sharýashylyǵy selektsiiasy men kútip-baǵý tehnologiialaryn jetildirý baǵytynda ǵylymi jumystar atqarylǵanyn, asyl tuqymdy qoilardyń uryqtary men embriondaryn alý, saqtaý protsesteri jetildirilgenin aitty.
«Qazaq ulttyq agrarlyq zertteý ýniversitettiń ǵalymdarynyń qatysýymen jaiylymdarǵa ǵaryshtyq monitoring júrgizý, qunarlyǵyn anyqtap olardy jaqsartý ádistemeleri daiyndaldy. Bul óz kezeginde qoi sharýashylyǵyna oń áserin tigizetini anyq», - dedi ol.
