Eńbek qatynastaryn retteý máseleleri jáne jumyspen qamtýdy qamtamasyz etý jónindegi sharalar respýblikalyq úshjaqty komissiia otyrysynda qaraldy, dep habarlaidy QazAqparat.
QR Premer-Ministriniń orynbasary Eraly Toǵjanovtyń tóraǵalyǵymen ótken Áleýmettik áriptestik pen áleýmettik jáne eńbek qatynastaryn retteý jónindegi respýblikalyq úshjaqty komissiianyń kezekti otyrysynda eńbek qatynastaryn retteý, «Teńizshevroil» JShS bosatylatyn jumys kerlerin jumyspen qamtý boiynsha sharalar kórsetý máseleleri talqylandy, sondai-aq Qazaqstan Respýblikasynda 2030 jylǵa deiingi qaýipsiz eńbek tujyrymdamasynyń jobasy qaraldy.
Is-sharaǵa Eńbek jáne halyqty áleýmettik qorǵaý, Ulttyq ekonomika, Qarjy, Ádilet, Energetika, Indýstriia jáne infraqurylymdyq damý ministrlikteriniń, áleýmettik seriktesterdiń, «Teńizshevroil» JShS ókilderi, sondai-aq oblystar, Almaty, Nur-Sultan jáne Shymkent qalalary ákimderiniń orynbasarlary qatysty.
Eńbek jáne halyqty áleýmettik qorǵaý ministri Serik Shápkenov otyrysqa qatysýshylardy eńbek qatynastaryn retteý boiynsha qabyldanyp jatqan sharalar týraly habardar etti.
Ol búgingi tańda Qazaqstanda 6,7 mln adam jumys isteitin 340 myńnan astam belsendi kásiporyn bar ekenin habarlady.
«Jumyskerlerdiń eńbek quqyqtarynyń saqtalýyn baqylaýdy 246 memlekettik eńbek inspektory júzege asyrady, olar 2021 jyly 5 130 tekserý júrgizdi, nátijesinde 10 783 buzýshylyq anyqtaldy. Júrgizilgen jumys qorytyndysy boiynsha jumys berýshilerge 3 371 uiǵarym berilip, 278,2 mln teńge somasyna 1 334 aiyppul salyndy», – dedi Serik Shápkenov.
Elimizdiń kásiporyndarynda 1465 adam zardap shekti, bul ótken jyldyń sáikes kezeńimen salystyrǵanda 2,5%-ǵa tómen (2020 jyly – 1503 adam).
Bul rette 200 adam qaitys boldy, bul 205 adam qaitys bolǵan 2020 jylmen salystyrǵanda 2,4%-ǵa tómen.
«Jumys oryndaryndaǵy eńbek jaǵdailarynyń naqty jai-kúiin baǵalaý jáne olardyń nátijeleri boiynsha sharalar keshenin iske asyrý úshin 4 206 óndiristik obekt attestattaýdan ótkizildi, 15,5 myńnan astam óndiristik keńester quryldy, onda 18 myńnan astam tehnikalyq inspektor ishki baqylaýdy júzege asyrady. Budan basqa, 2 796 kásiporynda eńbek qaýipsizdigi jáne eńbekti qorǵaý boiynsha halyqaralyq standarttar engizildi (OHSAS 18001, HEU-EQBJ)», – dep habarlady Eńbekmininiń basshysy.
Ol sondai-aq ótken jyly 164 kásiporyn «Halyqtyq baqylaý» jobasyn engizgenin, 292 kásiporyn «Vision Zero» nóldik jaraqattaný tujyrymdamasyna qosylǵanyn atap ótti.
Otyrys barysynda «Teńizshevroil» JShS ókilderi kásiporynnyń bosatylatyn jumyskerlerin jumyspen qamtý boiynsha kórsetiletin sharalar týraly habardar etti.
2021 jyldyń basynda bolashaq keńeitý jobasynyń jáne saǵalyq qysymdy basqarý jobasynyń aiaqtalýy nátijesinde 4 649 adam bosatyldy, onyń 37% - Atyraý oblysynyń turǵyndary.
1 286 adam TShO jobalary ishinde jáne 594 adam uiymnan tys jumys oryndaryna ie boldy.
Qalǵan qyzmetkerler úshin jergilikti atqarýshy organdar jumysqa ornalastyrý boiynsha jumys júrgizýde.
Óz kezeginde Serik Shápkenov memlekettik organdar TShO-men birlesip, 2021-2023 jyldarǵa arnalǵan «Teńizshevroil» JShS-niń bosatylyp jatqan jumyskerlerin jumyspen qamtý jáne josparly bosatýdy monitoringileý boiynsha is-sharalardyń jol kartasyn bekitkenin habarlady.
«Ótken jyldyń basynda respýblika boiynsha jumys oryndaryn saqtaý boiynsha 144,8 myńnan astam memorandým jasaldy. Jumys berýshiler alǵan mindettemelerin oryndaý kezinde 2,8 mln jumys ornyn saqtaý qamtamasyz etiledi», – dep atap ótti Eńbekmininiń basshysy.
Budan basqa, RÚK músheleri qyzmetkerlerdiń qaýipsiz eńbek jaǵdailaryna quqyqtaryn iske asyrýdy qamtamasyz etetin eńbekti qorǵaýdy basqarýdyń baǵdarlanǵan ulttyq júiesiniń táýekelin damytý maqsatynda ázirlengen Qazaqstan Respýblikasyndaǵy 2030 jylǵa deiingi qaýipsiz eńbek tujyrymdamasyn maquldady. Tujyrymdama sheńberinde 2030 jylǵa qarai 4 negizgi mindet aiqyndaldy:
– Táýekelge baǵdarlanǵan tásil negizinde eńbekti qorǵaýdy basqarýdyń ulttyq júiesin jańǵyrtý;
– kásiptik táýekelderdi tómendetý jónindegi sharalardy ekonomikalyq yntalandyrý;
– eńbekti qorǵaý salasyndaǵy kásibi quzyretter men ǵylymi áleýetti damytý;
– eńbekti qorǵaý salasyndaǵy baqylaý men monitoringtiń tiimdiligin arttyrý.
Tujyrymdamany iske asyrý barysynda 2030 jylǵa qarai ziiandy jáne basqa da qolaisyz eńbek jaǵdailarynda jumys isteitin qyzmetkerler sanyn 15%-ǵa deiin tómendetýge qol jetkizý, óndiristegi jazataiym oqiǵalar saldarynan zardap shekkender sanyn 0,24-ke deiin (1000 jumysshyǵa) tómendetý, sondai-aq eńbek zańnamasynyń saqtalýyn tekserý nátijeleri boiynsha anyqtalǵan buzýshylyqtardyń jalpy sanyna eńbekti qorǵaý salasyndaǵy buzýshylyqtar úlesin 15%-ǵa deiin tómendetý josparlanýda.
Otyrys sońynda Premer-Ministrdiń orynbasary qyzmetkerlerdiń eńbek quqyqtary men jumysqa ornalasýyn qamtamasyz etý boiynsha jumysty jalǵastyrýdy, jumystan bosatý, jumyskerlerdiń eńbek quqyqtarynyń qysqarýy jáne basqa da buzylý táýekelderine turaqty monitoring júrgizýdi, óndiristik jaraqattanýdyń ósýine jol beretin jumys berýshilerge sharalar qabyldaýdy, sondai-aq eńbek janjaldaryna jol bermeý jóninde sharalar qabyldaýdy tapsyrdy.
Eraly Toǵjanov áleýmettik áriptestik qyzmetkerlerdiń áleýmettik-ekonomikalyq múddelerin, eńbek kepildikterin saqtaý, áleýmettik turaqtylyqty saqtaý máselelerin sheshýge múmkindik beretin áleýmettik jáne eńbek qatynastary salasyndaǵy memlekettik saiasatty iske asyrý tetikteriniń biri bolyp tabylatynyn atap ótti.
