Foto: QR TJM
Aýa raiynyń qolaisyzdyǵyna bailanysty TJM bólimsheleri kúsheitilgen rejimde qyzmet atqaryp jatyr, dep habarlaidy Tótenshe jaǵdailar ministrliginiń baspasóz qyzmeti.
Vedomstvo málimetinshe, úsh táýlik ishinde TJM kúshteri 1000-nan asa adamdy, onyń ishinde 86 balany qutqarǵan. Sonymen qatar 583 órt sóndirilip, 263 avariialyq-qutqarý jáne izdestirý jumystary júrgizilgen.
"Tek ótken táýliktiń ishinde TJM qutqarýshylary jergilikti atqarýshy organdarmen, politsiiamen, áskeri qyzmetshilermen jáne jol qyzmetterimen birlesip 887 adamdy qutqardy.
Aýa-raiynyń nasharlaýyna bailanysty avtokóliktiń barlyq túri úshin respýblikalyq jáne oblystyq mańyzy bar avtojoldardaǵy qozǵalysqa shekteý engizildi.
Soltústik Qazaqstan oblysynda «Cheliabinsk-Novosibirsk» respýblikalyq mańyzy bar avtojolynda dizel otynynyń qatyp qalýy saldarynan Tájikstannan Reseige bara jatqan jolaýshylar avtobýsy toqtap qaldy. 31 jolaýshy jylytý pýnktine ornalastyryldy.
Jambyl oblysynda «Almaty-Tashkent» avtojolynyń ýchaskesiniń jabylýyna bailanysty avtokólikter keptelisi oryn aldy. Toqtap turǵan kólik quraldarynan 392 adam qutqaryldy. Onyń 221-i temirjol kóligimen jóneltildi. Qalǵan jolaýshylar eki jylytý pýnktine ornalastyryldy" - delingen habarlamada.
Sonymen qatar, Qordai aýdanynda qarǵa batyp qalǵan avtokólikterden 165 adam qutqarylyp, jylytý pýnktterine jetkizilgen.
"Túrkistan oblysynda TJD kúshteri burqasynnan 287 adamdy qutqardy, olar úilerine, temirjol vokzalyna jetkizildi nemese jylytý pýnktterine ornalastyryldy.
Almaty, Jambyl, Túrkistan, Pavlodar oblystarynda izdestirý-qutqarý jumystary sátti aiaqtaldy. Qutqarýshylar, politsiia qyzmetkerleri men jergilikti turǵyndardyń qutqarý toptary qolaisyz aýa-raiynda mal baǵýǵa jáne mal izdeýge shyqqan alty adamdy tapty" - delingen habarlamada.
Vedomstvo málimetinshe, qysta tótenshe jaǵdailardy boldyrmaý úshin, eń aldymen, aýa-raiynyń ózgerýin, meteorologiialyq aqparatty, aýa-raiynyń nasharlaýy týraly arnaiy habarlamalardy, joldardyń jabylýyn, daýyldy eskertýlerdi únemi qadaǵalap otyrý qajet.
"Aiazdy kúnderi peshterdi qyzdyrý, jylytqyshtardy paidalaný, elektr júiesin júkteý jáne basqalar saldarynan órt qaýpi artady.
TJM daýyldy eskertý kezeńinde alys saparǵa shyqpaýǵa, alys qashyqtyqqa jaiaý júrýden bas tartýǵa keńes beredi. Órttiń aldyn alý úshin jylytý júieleriniń, elektr jabdyqtarynyń durystyǵyn qadaǵalańyzdar, peshterdi qyzdyrmańyzdar jáne joǵary qýatty qurylǵylardy bir ýaqytta qosý arqyly elektr júiesin shamadan tys júktemeńizder" - deidi ministrlik baspasóz qyzmeti ókilderi.
