Esep komitetiniń tóraiymy Natalia Godýnova Prezidenttiń Joldaýda bergen tapsyrmasyna sáikes, biýdjet pen Ulttyq qor qarajatyna óte qatań baqylaý júrgiziletinin málim etti, dep habarlaidy QazAqparat.
«Prezident ataǵan barlyq baǵyttar boiynsha biýdjet pen Ulttyq qor qarajatyna óte qatań baqylaý júrgiziledi. Ózderińiz estigendei, Úkimet pen Esep komitetine úsh aidyń ishinde ulttyq kompaniialardyń ǵana emes, kvazimemlekettik sektordyń jumysynyń tiimdiligine taldaý júrgizý mindeti júkteldi. Menińshe, bul jumys barynsha tiianaqty júrgizilip, nátijesi Prezidentke baiandalady», - dedi Natalia Godýnova Parlamenttiń birlesken otyrysynan keiin tilshilerdiń saýaldaryna jaýap bere otyryp.
Esep komitetiniń tóraiymy «Samuryq-Qazyna» ulttyq ál-aýqat qoryna, «Báiterek» holdingine, «QazAgroǵa» tekserý júrgizilgenin aityp ótti.
«Qosymsha taǵy da taldaý jumystary júrgiziledi. Ulttyq kompaniia qyzmetkerleri men memlekettik qyzmetshilerdiń sanyn azaitý bastamasyna da burynnan jaqyndap kelemiz», - dedi Natalia Godýnova.
Eske sala ketsek, búgin QR Prezidenti Qasym-Jomart Toqaev Qazaqstan halqyna Joldaýyn jariialady.«Memleket aldaǵy ýaqytta da bizneske qoldaý kórsetedi. Ulttyq qordan 100 mlrd teńgege jýyq qarjy bólindi. Biraq, sarapshylardyń pikirinshe, qarjylai qoldaýdyń igiligin jergilikti bilikpen bailanysy bar sharýashylyqtar ǵana kórip otyr. Shyn máninde jańa jobalar boiynsha kompaniialar qurylyp, jumys oryndary ashylýy kerek edi. Biraq, jergilikti ákimder uiymdastyrý jumystaryn talapqa sai oryndamaǵan. Sonyń saldarynan salyq jáne zeinetaqy tólemderin arttyryp, jergilikti biýdjetti nyǵaitýǵa jaǵdai jasalyp otyrǵan joq», - dedi Memleket basshysy Qazaqstan halqyna Joldaýynda.Osyǵan orai, Prezident Esep komitetine jáne Qarjy ministrligine qarajattyń jumsalýyn qatań baqylaýǵa alýdy tapsyrdy.
