Otbasynyń naýqas múshesine kútim jasaityn jumyskerlerge tolyq emes jumys ýaqyty rejimine quqyq berilmek. Bul týraly Parlament Májilisinde eńbek máseleleri jónindegi zań jobasyn talqylaý kezinde QR Eńbek jáne halyqty áleýmettik qorǵaý ministri Birjan Nurymbetov málim etti, dep habarlaidy "Ult aqparat".
«Jalaqysy saqtalmaityn demalys búginde taraptardyń óz kelisimi boiynsha beriledi. Alaida otbasynyń naýqas múshesiniń kútimi boiynsha uzaq demalys qajet bolǵan kezde, jumyskerler jalaqysy saqtalmaityn demalys ala almai, sonyń saldarynan jumystan shyǵýǵa májbúr bolyp jatady. Osyǵan bailanysty meditsinalyq qorytyndyǵa sáikes, kútimdi qajet etetin otbasy múshesine kútim jasaý úshin jumyskerlerge tolyq emes jumys ýaqyty rejimin engizý usynylady», - dedi ministr.
Budan buryn habarlanǵandai, Májilistiń jalpy otyrysynda «Qazaqstan Respýblikasynyń keibir zańnamalyq aktilerine eńbek máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasynda jumyskerdiń laiyqty eńbek jáne turmys jaǵdailaryna quqyǵyn belgileý jáne ákimshilik zańnamaǵa teń eńbek jaǵdailary boiynsha kemsitý faktilerine jol bergeni úshin jumys berýshilerdi jaýapkershilikke tartýǵa negizdeme engizýge usynylady.
Qujat eńbek qatynastaryn, áleýmettik seriktestikti, qaýipsizdik jáne eńbekti qorǵaý máselelerin retteýge baǵyttalǵan.
