Biz - otar bolǵan jurtpyz. El bolý úshin otarsyzdanýymyz kerek. Otarsyzdaný úderisin bastaityn kez keldi. Ol úshin eshkimnen qoryqpai, eshkimge jaltaqtamai, Qazaqstannyń eń joǵary zań shyǵarý organdary - Senat, májilis - "Otarsyzdaný" týraly zań aktisin qabyldap, bekitý kerek. Al, ol úshin qazirden bastap Qazaqstannyń saiasi institýttary (mysaly - "Memleket jáne tarih institýty") osy máseleni zertteýdi qolǵa alýy kerek. Álemniń otar bolǵan memleketteri bul úderisti qalaisha júzege asyrdy degen máseleni túbegeili zerttegen durys.
Eger biz qazaq qoǵamynyń osy keselin elemei, eskermei, jaýyrdy jaba toqi beretin bolsaq, aýrý qoǵamnyń derti asqynǵannyń ústine asqynyp qoǵamdyq jaǵdai ýshyǵa beredi. Onyń aiqyn dáleli - Qaraǵandy oqiǵasy. Bul - eskertý!
Sosyn, "qazaq tarihynda biz uialatyn eshteńe joq" degen syndy negizsiz pikirlerdi toqtatý kerek. Birtutas halyqtyń tiri organizm retinde bas bostandyǵynan aiyrylyp (basynan aiyrylyp) ózge memleketke (Resei imperiiasyna, sosyn - Qyzyl sovet imperiiasyna) otar bolǵany - qul bolǵany uiat emes pe?
Taǵy qaitalap aitamyn, Ult, Memleket - tiri organizm retinde saýyǵýy úshin - eń birinshi keseldiń diagnozyn qoiý kerek; diagnozyn qoimasa, organizm jazylmaidy. Qazaq qoǵamy - aýrý! Diagnozy - Otarlyq. Eger qazirgi biliktiń buny moiyndaýǵa erik-jigeri jetpese, ornyn bosatsyn, ornyna osy qazaq ulty úshin asa mańyzdy sharany júzege asyra alatyn deni saý, otarlyq-quldyq etinen ótip, súiegine jetpegen, ishki úreiden ada jańa urpaq, jańa generatsiia kelsin.
Aqqa Qudai jaq! Isimiz - aq! Bireýdi kemsitý, bireýdiń shamyna tiiý oida joq, oiymyz - Qazaq qoǵamyn saýyqtyrý. Qisaiyp ketken týymyzdy tiktep, shurq tesik Esimizdi bútindeý! "Aýrýyn jasyrǵan óledi" deidi dana halqymyz. Qazaq retinde, Ult retinde, Memleket retinde ólip ketpeý úshin aýyr bolsa da osy sharaǵa barýymyz kerek. Sonda ǵana Alash arysy Ǵumar Qarash armandaǵan ár isimizden qazaqtyń isi shyǵyp turatyn bolady! Sonda ǵana Máńgilik El bolamyz!
Omar Jáleldiń feisbýktaǵy jazbasynan
