«Qazaqstan» ulttyq arna túsirgen serialdar AQSh, Pýerto-Riko, Kanada, Latyn Amerikasy elderinde kórsetiledi. Bul týraly «Astana Media Week 2020» barysynda «Qazaqstan» RTRK» AQ Basqarma tóraǵasy Lázzat Tanysbai aitty, dep habarlaidy QazAqparat.
«Sońǵy jyldary ónimderdi sheteldik telearnalarǵa belsendi satý arqyly jańa qarjy kózderin arttyrdyq. Karantin kezinde de bul jumys jalǵasty. Biylǵy jyldyń ózinde halyqaralyq «Ocean New Media, LLC» kompaniiasy AQSh, Pýerto-Riko, Kanada, Latyn Amerikasy elderiniń spýtniktik jáne kabeldik arnalary men internet platformalary úshin bizden 8 serial, 6 animatsiialyq mýltfilm satyp aldy. Endi kompaniia bizdiń kontentti portýgal, aǵylshyn, ispan tilderine aýdaryp óz kórermenderine usynady», - dedi ol.
Onyń dereginshe, jalpy bólim sany 242 bolatyn 10 serial TMD-daǵy eń úzdik onlain-kinoteatr sanalatyn IVI.RU platformasyna satyldy. IVI.RU kontenti bir aida 50 millionǵa jýyq qaralym jinaidy.
«Bul – biz úshin úlken naryq», - dedi basqarma tóraǵasy.
Sonymen qatar Lázzat Tanysbai búgingi tańda korporatsiia mediaaktivterine qarasty saittardyń turaqty paidalanýshylar sany 7 mln-ǵa jáne «Qazaqstan», «Abai tv», «Balapan», «Qazsport» arnalarynyń YouTube jelisindegi jazylýshylarynyń sany 4,3 mln-ǵa jetkenin aitty.
