Otandyq fýtbol klýbtarynda legionerler sanyn azaitý máselesi qaralady. Bul jaiynda Májilis depýtattarynyń resmi saýalyna jaýap bergen QR Premer-ministri Asqar Mamin atap ótken, dep habarlaidy QazAqparat tilshisi.
«Sheteldik fýtbolshylardy kásibi klýbtarǵa tartý keń taralǵan álemdik tájiribe. Sheteldik fýtbolshylar óz elderi fýtbolynyń elementterin alyp kelip qazaqstandyq fýtboldy jetildire túsedi, ol qazaqstandyq fýtbolshylarǵa álemdik tájiribeden tek jaqsysyn alýǵa múmkindik beredi. Máselen, Gollandiia jáne Italiiada legionerlerge shekteý joq. Frantsiiada tek 4 qana legioner shaqyra alady. Qazaqstandyq Premer-Ligada ár klýb maýsymǵa 8 sheteldik oiynshy tirkei alady, alańda bir ýaqytta 6 ǵana oiynshy bola alady. Reseide de legionerler sany boiynsha tájiribe osyndai», - dedi Asqar Mamin.
Úkimet basshysynyń atap ótýinshe, sheteldik oiynshylarǵa qoldanystaǵy limit qazaqstandyq oiynshylarǵa qajetti tájiribeni qamtamasyz etýge jáne Eýropada jetistikterge jetýge múmkindik beredi. Keleshegi bar otandyq jastardy tartý maqsatynda Mádeniet jáne sport ministrligi otandyq fýtbol klýbtarynda legionerler sanyn azaitý máselesin qaraityn bolady.
«Joǵaryda atalǵandai, Qazaqstanda buqaralyq jáne balalar men jasóspirimder fýtbolyn damytýǵa jaǵdai jasalýda. Aitalyq, Dene shynyqtyrý men sportty damytýdyń 2025 jylǵa deiingi tujyrymdamasyn iske asyrý boiynsha is-sharalar josparynda fýtbol alańdary (manejder) jelisin damytý boiynsha sharalar belgilengen. Fýtboldy damytý bóliginde kórsetilgen is-sharalar josparyn iske asyrýdyń oń tájiribesin eskere otyryp, spartakiadalardy, fýtboldan stýdenttik jáne mekteptik ligalardy ótkizý jalǵasatyn bolady», - dedi ol.
A.Mamin Elbasynyń 2018 jylǵy 5 qazandaǵy Joldaýy aiasynda jas fýtbolshylardy daiyndaý, sondai-aq sporttyq nysandar men fýtbol alańdaryn salý maqsatynda muqtaj eldi mekenderde 100 dene shynyqtyrý-saýyqtyrý keshenderin salý boiynsha jumys júrgizilip jatqandyǵyn da atap ótken.
«Sonymen qatar qoldanystaǵy sporttyq infraqurylymdy paidalanýdyń tiimdiligin joǵarylatý boiynsha sharalar kesheni, sporttyq keshender men quraldardyń balalar úshin qoljetimdigin qamtamasyz etý boiynsha jańa tásilder ázirlendi», - dedi Premer-ministr.
Aita keteiik, 23 qańtarda Májilistiń bir top depýtaty sol kezdegi Premer-ministr Baqytjan Saǵyntaevtyń atyna resmi saýal joldap, sheteldik legionerlerdi tartý tájiribesin retteýge jáne únemdelgen qarajatty sport mektepterinde, sektsiialarda, onyń ishinde aýyldyq jerlerde jas fýtbolshylardy daiarlaýǵa, sondai-aq sport nysandary men fýtbol alańdaryn salýǵa baǵyttaýǵa usynys jasaǵan bolatyn.
