Otandyq biopreparat óndirýshiler úshin salyqtyq jeńildikter berý kerek. Bul týraly búgin Úkimet otyrysynda Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakaria aitty, dep habarlaidy QazAqparat.
«Jetistikterge qaramastan institýt kelesi máselelerdi sheshýdi usynady: klinikaǵa deiingi jáne klinikalyq zertteýlerge qosymsha qarjylandyrý; DDU-da sertifikattaý úshin DSM ulttyq retteýshi jáne sarapshy organynyń jetilýiniń 3-shi deńgeiine qol jetkizýdi jedeldetý; Aýyl sharýashylyǵy ministrligimen ǵylymdy qajetsinetin ónimge uzaq merzimdi kelisimsharttar jasasýdy pysyqtaý; otandyq biopreparattar óndirýshiler úshin salyqtyq jeńildikter kózdeý; eksportqa shyǵarylatyn biopreparattar men ǵylymdy qajetsinetin ónimderdi sýbsidiialaýdy kózdeý; dárilik preparattardy tirkeý kezinde baqylaý jáne saraptama rásimderiniń merzimderin ońtailandyrý; materialdyq-tehnikalyq bazany jańartý», - dedi institýt basshysy.
Osy rette ol Memleket basshysynyń tapsyrmasy boiynsha BQPǴZI jáne «OtarBioPharm» biofarmatsevtikalyq zaýytynyń jumyskerleri úshin otandyq ǵalymdardy áleýmettik qoldaý aiasynda 60 páterli úsh turǵyn úi jáne dene shynyqtyrý-saýyqtyrý kesheni salynyp, paidalanýǵa berilgenin atap ótti.
«Qazirgi ýaqytta BQPǴZI men «OtarBioPharm» JShS-niń búkil qyzmetkerleri turǵyn úimen qamtamasyz etilgen. Qyzmetkerlerdiń jalaqysy ótken jyldarmen salystyrǵanda ósti. Eger 2019 jyly ortasha jalaqy 205 myń teńgeni qurasa, 2021 jyly ǵalymnyń ortasha jalaqysy 405 myń teńgege deiin artty», - dedi Kúnsulý Zakaria.
